Út­lit fyrir bíó­lausa Akur­eyri

Eignin, sem er nánar tiltekið á Strandgötu 4 í miðbæ Akureyrar, var sett á sölu í byrjun júlí. Húsið var byggt árið 1929 og í því eru tveir bíósalir sem taka tæplega 300 manns í sæti, að því er fram kemur á fasteignavef Vísis. Bíóhúsið er falt fyrir 290 milljónir. 

Framkvæmdastjóri Sam-félagsins, sem rekur Sambíóin er Björn Ásberg Árnason. Í samtali við fréttastofu gefur hann nokkrar ástæður fyrir sölunni. Hlutirnir hafi horft til betri vegar í bíórekstri eftir heimsfaraldur, en þá hafi verkföll hjá handritshöfundum hafi haft áhrif á myndaúrval. 

„En núna finnum við fyrir því að myndaúrvalið er að koma í eðlilegra rennsli, og þá langar okkur að horfa meira inn á við, huga að umsvifum og einbeita okkur að Reykjavík,“ segir Björn Ásberg.

Reksturinn hafi almennt gengið vel. „En við erum að fjarstýra því úr bænum engu að síður,“ segir Björn sem telur aðra geta farið enn betur með bíóið.  „Vonandi verður bara áfram bíó“.

Einhverjar þreifingar og óformlegar viðræður hafi átt sér stað við áhugasama kaupendur. 

„Við settum þetta á sölu í júlí þegar allir eru úti og suður þannig við bjuggumst ekki við miklum viðbrögðum fyrr en beint eftir versló,“ segir Björn. 

Fyrir rúmum tveimur árum voru bíóhúsin tvö á Akureyri, annars vegar Sambíóhúsið og hins vegar Borgarbíó. Sögu borgarbíós lauk í mars 2022 en það var þá eitt elsta bíó landsins, stofnað af góðtemplurum á Akureyri árið 1956.