Mbappé mætti á æfingu í dag með plástur á nefinu

Mbappé nefbrotnaði þegar hann skallaði öxl Kevin Danso, varnarmann Austurríkis, í 1-0 sigri Frakklands á mánudag.

Hann tók ekki þátt á æfingu liðsins í gær en lét sjá sig í dag, miðvikudag, tveimur dögum fyrir næsta leik gegn Hollandi.

Einhverjir vonuðust til þess að framherjinn knái myndi skarta andlitsgrímu en Mbappé lét plástur duga. Hann æfði einn að mestu leyti í dag en tók þátt í skotæfingu liðsins.

Algjörlega óvíst er hvort hann verði með í leiknum á föstudag en hann gaf það sterklega í skyn á Instragram í gær þegar hann skrifaði við sögu sína „Án áhættu vinnst ekkert.“ Sömuleiðis spurði hann á X, áður Twitter, hvort aðdáendur hefðu hugmyndir að grímu fyrir hann.