Gerðu á­rásir í átta héruðum Rúss­lands

Úkraínskum drónum var flogið í að minnsta kosti átta héruðum. Einn þeirra er sagður hafa verið skotinn niður einum af fjórum alþjóðlegum flugvöllum Moskvu, samkvæmt AP fréttaveitunni.

Varnarmálaráðuneyti Rúslands segist hafa skotið dróna yfir Belgórod, Bríansk, Kúrsk, Leníngrad og Túla. Þá hafi eldflaugar frá Úkraínu einnig verið skotnar niður yfir Belgórod.

Eldur kviknaði í olíuvinnslustöð í Nisní Novgorodhéraði, sem er um 775 kílómetra frá landamærum Úkraínu, þegar dróni sprakk þar í loft upp í nótt. Árás var einnig gerð á aðra olíuvinnslustöð í Oríól, sem er um 116 kílómetra frá Úkraínu.

Vólódímír Selenskí, forseti Úkraínu, tilkynnti í fyrra að mikið púður hefði verið lagt í þróun nýrra sjálfsprengidróna sem hægt væri að nota til árása í allt að sjö hundruð kílómetra fjarlægð. Undanfarnar vikur hafa Úkraínumenn væntanlega notað slíka dróna til fjölmargra árása í Rússlandi.

Margar þeirra virðast beinast að olíu- og gasvinnslu í Rússlandi, sem er helsta tekjulind ríkisins.

Fregnir hafa einnig borist af eldi í Pétursborg í morgun.

Til viðbótar við drónaárásir í Rússlandi gerðu rússneskir menn sem berjast með Úkraínumönnum áhlaup í Belgórod og Kúrskhéruð í Rússlandi. Forsvarsmenn hópa sem kallast „Frjálst Rússland hersveitin“, „Síberíska herfylkið“ og „Rússneska sjálfboðaliðasveitin“ birtu yfirlýsingar á samfélagsmiðlum í morgun þar sem þeir lýstu því yfir að ný áhlaup á Rússland hafi verið gerð.

Þetta hafa hóparnir nokkrum sinnum gert frá því innrás Rússa í Úkraínu hófst og segjast meðlimir þessara hópa vilja frelsa Rússland frá Vladimír Pútín, forseta.

Óljóst er hve miklum árangri þessi áhlaup hafa skilað en héraðsstjóri Kúrsk segir að til skotbardaga hafi komið og að áhlaupið hafi verið stöðvað. Myndefni sem birt hefur verið á samfélagsmiðum sýnir skriðdrekum ekið um svæðið.