Super Bowl í kvöld eða kannski frekar Taylor Bowl

Leikurinn um Ofurskálina er stærsti íþróttaviðburður í Bandaríkjunum og þegar næstum öll bandaríska þjóðin fylgist með úrslitaleiknum í stærstu íþrótt þjóðarinnar með öllu því auka sem þessi leikur býður upp á.

Auglýsingarnar eru þær dýrustu og flottustu í bandarísku sjónvarpi og hálfleiksatriðið trekkir líka að. Svo er það auðvitað leikurinn sjálfur þar sem bestu lið tímabilsins keppast um meistaratitilinn.

Í ár bætist við þennan risaleik að hann fer í fyrsta sinn fram í skemmtanaborginni Las Vegas með öllu sem því fylgir og svo eru það auðvitað Taylor Swift áhrifin.

Swift er ekki aðeins ein allra stærsta tónlistarstjarna heimsins í dag heldur er hún kærasta eins besta leikmanns Kansas City Chiefs, innherjans Travis Kelce.

Samband Swift og Kelce hefur haft mikil áhrif á áhugi á NFL deildinni í vetur þar sem aðdáendur Swift, sem hafa aldrei haft áhuga á NFL, fylgjast nú vel með vegna hennar. Swift hefur verið dugleg að mæta á leikina hjá Kansas City og mun mæta til Las Vegas eftir þrettán tíma flug frá Japan þar sem hún hélt fjóra tónleika í vikunni.

Spámenn búast við enn meira áhorfi á leikinn vegna veru hennar á Allegiant leikvanginum í kvöld. Taylor hefur aldrei viljað skemmta í hálfleik á Super Bowl en hún verður örugglega mikið í mynd á leiknum í kvöld.

En aftur að leiknum sem er nú auðvitað aðalatriðið.

Kansas City Chiefs vann titilinn í fyrra og getur orðið fyrsta liðið í tuttugu ár til að vinna tvö ár í röð. Chiefs getur jafnframt unnið sinn þriðja titil á aðeins fimm árum.

San Francisco 49ers vann fimm titla á níunda og tíunda áratugnum á en það eru 29 ár síðan þeir urðu meistarar síðast.

49ers liðið hefur verið í Super Bowl ham frá fyrsta leik á tímabilinu en það kemur mörgum á óvart að Chiefs liðið sé þarna eftir að hafa litið ansi illa út um mitt tímabil.

Chiefs hefur vaxið ásmegin með hverjum leiknum frá því í desember og í úrslitakeppninni vann liðið frábæra útisigra á öflugum liðum Buffalo Bills og Baltimore Ravens.

49ers vann flotta sigra á Green Bay Packers og Detroit Lions á leið sinni í úrslitaleikinn.

Það sem gerir þennan leik enn merkilegri er að liðin mættust líka í Super Bowl leiknum árið 2019. Þá vann Chiefs liðið 31-20 sigur eftir frábæra endurkomu þar sem liðið vann fjórða leikhlutann 21-0.

Bara níu leikmenn úr hvoru liði eru enn með liðunum en báðir þjálfararnir, Andy Reid hjá Chiefs og Kyle Shanahan hjá 49ers, stýrðu liðunum líka þá. Patrick Mahomes var valinn mikilvægasti leikmaður leiksins og Travis Kelce skoraði snertimark.

Stærstu stjörnur 49ers eins og hlauparinn Christian McCaffrey og leikstjórnandinn Brock Purdy voru ekki með liðinu þá, Purdy var einn í háskóla og McCaffrey spilaði þá með Carolina Panthers.

Purdy var valinn síðastur í nýliðavalinu og myndi væntanlega tryggja sér Hollywood mynd leiði hann liðið til sigurs. Mahomes getur aftur á móti haldið áfram að byggja upp afrekaskrá sína sem mögulega einn af bestu leikmönnum sögunnar.

San Francisco 49ers og Kansas City Chiefs mætast í leiknum um Ofurskálina í ár en Super Bowl hátíðin er að sjálfsögðu sýnd beint á Stöð 2 Sport 2. Útsendingin hefst klukkan 22.00 á sunnudaginn með upphitun fyrir leikinn en leikurinn sjálfur byrjar síðan upp úr klukkan 23.30.