ESPN sýndi þarna leik Washington og Texas um Sykurskálina en þessi leikur fer alltaf fram í Superdome í New Orleans.
Eins og vaninn er í bandarískum útsendingum frá kappleikum þá eru sýndar reglulega myndir frá borginni þar sem leikurinn fer fram.
ESPN has apologized after video clip of a woman baring her breast was shown during the broadcast of the Sugar Bowl in New Orleans. https://t.co/FZy7JudoIl
— NBC News (@NBCNews) January 2, 2024
Svo var einnig nú og skipt var yfir á hina frægu gleðigötu Bourbon Street þegar komið var út úr einu auglýsingahléinu.
Það tókst þó ekki betur en svo en á þeim stutta tíma sem myndavélin sýndi lífið á Bourbon Street þá tókst ónefndri konu að flassa myndavélina.
ESPN náði ekki að klippa nógu fljótt út úr mynd og myndirnar af berbrjósta konunni fóru á mikið flug á samfélagsmiðlum.
„Við hörmum það að þetta gerðist og biðjumst afsökunar á því að þessar myndir hafi farið í loftið,“ sagði Bill Hofheimer, talsmaður ESPN við Associated Press.
Það er seinkun á mynd í beinum útsendingum en næst þegar sýnt er frá gleðigötunni í einni mestu skemmtanaborg Bandaríkjanna þá borgar sig kannski að bæta þar við nokkrum sekúndum svona til öryggis.
Washington tryggði sér Sykurskálina í ár með 37-31 sigri á Texas.
