Hver er þessi þrí­tugi japanski lands­liðs­maður sem á að leysa vand­ræði Liver­pool?

Félagaskiptaglugginn hjá Liverpool hefur verið ansi sérstakur. Liðið var snemma búið að festa kaup á heimsmeistaranum Alexis Mac Allister frá Brighton og kom svo mögum í opna skjöldu þegar félagið opnaði budduna og nældi í Dominik Szoboszlai frá RB Leipzig.

Síðan þá hefur hins vegar lítið gerst. Liðið missti af Moses Caceido til Chelsea á dögunum eftir ótrúlega atburðarás og þá ákvað hinn ungi Romeo Lavia einnig að neita félaginu en Liverpool hafði verið á höttunum á eftir honum í ansi langan tíma.

Í gær og í dag voru síðan fjölmargir miðjumenn orðaðir við félagið úr Bítlaborginni. Khephren Thuram, Ryan Gravenberch, Sofyan Ambrabat, Federico Valverde, Kalvin Philips, Boubacar Kamara og Cheick Doucoure voru á meðal þeirra sem nefndir voru til sögunnar en ekkert fast í hendi.

Á topplistum í Þýskalandi

Enginn hafði þó stungið upp á hinum þrítuga Japana Wataru Endo, fyrirliða Stuttgart. Líklega því flestir vissu lítið sem ekkert um hann. Engu að síður virðist sem hann sé lausnin sem Jurgen Klopp fann á vandræðum Liverpool, þó vissulega sé ekki ólíklegt að frekari kaup verði gerð á næstu dögum.

Fjölmiðlar hafa greint frá því að 16 milljón punda tilboði Liverpool hafi verið tekið og að Endo gangist undir læknisskoðun hjá Liverpool á morgun.

Wataru Endo hefur leikið með Stuttgart síðan árið 2020 en lék áður fyrir Shonan Bellmare og Urawa Red Diamonds í heimalandinu auk Sint-Truiden í Belgíu. Hann er núverandi fyrirliði þýska félagsins og hefur þar að auki leikið meira en 50 landsleiki fyrir Japan.

Þó einhverjir stuðningsmenn Liverpool hristi eflaust höfuðið yfir þessum félagaskiptum gæti tölfræði úr þýsku úrvalsdeildinni frá því á síðustu leiktíð fengið þá til að gleðjast.

Samkvæmt úttekt knattspyrnutímaritsins Kicker var Endo einn af sex varnarsinnuðum miðjumönnum í deildinni sem tímaritið flokkaði í „alþjóðlegum klassa“. Á heimasíðu þýsku úrvalsdeildarinnar er honum líkt við Claude Makelele í umfjöllun og hann var í fjórða sæti yfir þá leikmenn á síðustu leiktíð sem átti flestar heppnaðar tæklingar.

Endo er hátt skrifaður hjá Stuttgart, sérstaklega eftir að hafa skorað gríðarlega mikilvægt mark fyrir félagið undir lok tímabilsins 2021-22 þegar félagið átti í harðri fallbaráttu.

Liverpool hefur verið þekkt fyrir það á síðustu árum að næla í leikmenn mörgum að óvörum. Gangi félagaskipti Waturo Endo í gegn verða þau þó að teljast með þeim allra óvæntustu á síðustu árum.