Met í komum skemmti­ferða­skipa til Ísa­fjarðar

Eftir nokkrar tafir sér loks fyrir endann á lengingu hafnarkantsins í Sundahöfn úr 290 metrum í 600 metra svo hægt verði að taka á móti fleiri skemmtiferðaskipum í einu. Hilmar Kristjánsson Lyngmo segir að fyrir tíu árum hefði gott að fá tæplega fimmtíu skemmtiferðarskip til Ísafjarðar en þeim hefði fjölgað hratt á undanförnum árum.

„Já, og bara síðan í fyrra. Það komu 119 skip í fyrra og það eru bókaðar 206 komur í ár. Það er eitthvað búið að afbóka reyndar út af hafnarframkvæmdunum. Þannig að ég veit ekki hver endanleg tala verður,“ segir hafnarstjórinn. Það væru aðallega allra stærstu skipin sem hefðu hætt við að koma.

Heildaríbúafjöldi Ísafjarðarbæjar er rúmlega 3.800 manns að meðtöldum nálægum byggðakjörnum. Það munar því um það þegar stór skip með fjölda farþega koma í bæinn.

„Menn verða alveg varir við þegar það koma sex þúsund manns í bæinn, á finnst fyrir því. En mikið af þessu fólki fer í rútuferðir bæði aðDynjanda og Ósvör og siglingar inn í Vigur. Þannig að þetta dreifist. Ég myndi segja að 60 til sjötíu prósent farþeganna fari í skipulagðar ferðir. Hinir eru röltandi um bæinn að skoða sig um,“ segir Hilmar.

Í Sundahöfn hittum við farþega á öllum aldri en þennan daginn voru Bandaríkjamenn helst áberandi. Ein eldri kona segist hafa verið að slappa af í Barcelona þegar hún ákvað að stökkva á skip til Íslands. En Page Parish frá Kaliforníu var mættur með 17 ára dóttur sinni og fjölskyldu.

„Þetta er magnað. Fallegt landslag, gróðurinn, þetta er ótrúlegt. Fallegur sólríkur dagur þótt ég viti að veðrið hér getur breyst hvenær sem er en þetta er fallegasti dagurinn sem við höfum fengið,“ segir herra Parish.

Hvað fékk þig til að fara í þessa ferð?

„Þetta er útskriftarferð dóttur minnar úr menntaskóla og af öllum stöðunum sem hún gat valið vildi hún koma hingað,“ segir hann léttur í bragði. Regan dóttir hans viðurkenndi að hún hefði ekki vitað mikið um Ísland annað en að Björk væri þaðan, en almennt væri hún hrifin af framandi landslagi.

„Ég laðast að landslaginu og náttúrunni. Ég hef gaman af að ganga og það er það sem við ætlum að gera í dag. Mér finnst það frábært að fólk geti numið land, sest að og fundið sína eigin leið til að lifa af,“ segir Regan.

Hafnarstjórinn er ánægður með sumarið.

Hvað er þetta margt fólk sem er að koma til Ísafjarðar?

„Miðað við bókanir eru það svona 150 þúsund farþegar sem koma hingað í sumar.“ Það væri miðað við að skipin væru fullbókuð, sem þau væru ekki alltaf. En 150 þúsund manns er fleira fólk en býr í höfuðborginni.

Hafnarsjóður hlýtur að fitna á þessu?

„Sextíu til sjötíu prósent af tekjum hafnarinnar eru skemmtiferðaskip. Það munar mikið um það,“ segir Hilmar Kristjánsson Lyngmo.