Forstjóri Landsvirkjunar segir stefna í erfiðan raforkuskort

Kristján Már Unnarsson skrifar 29. júní 2023 21:48

Hörður Arnarson er forstjóri Landsvirkjunar. Einar Árnason

Forstjóri Landsvirkjunar segir stefna í erfiðan raforkuskort á næstu árum ef ekki verður losað um þau virkjanaáform sem sitja föst í kerfinu. Hann skorar á sveitarfélög að blanda ekki lögbundinni skipulagsskyldu inn í ágreining við ríkið um tekjustofna.

Boranir í sumar á Þeistareykjum eftir meiri jarðgufu eru sem stendur einu framkvæmdirnar á vegum Landsvirkjunar til meiri orkuöflunar.

„Okkur er að miða ágætlega fyrir norðan á Þeistareykjum með tilraunaboranir þar. En það er fyrir norðan. Sú orka kemst ekki suður. Eftirspurnin er hvað mest hérna fyrir sunnan ,“ segir Hörður Arnarson, forstjóri Landsvirkjunar, í viðtali í fréttum Stöðvar 2.

Frá borun á Þeistareykjum.Stöð 2/Skjáskot

Sunnan heiða hafði Landsvirkjun aðeins fengið grænt ljós í rammaáætlun á tvo nýja virkjunarkosti. Auk Hvammsvirkjunar var það vindorkulundur við Búrfell.

Í fréttum Stöðvar 2 í síðustu viku kom fram að Skeiða- og Gnúpverjahreppur er búinn að setja Búrfellslund í biðstöðu. Rangárþing ytra hefur gert hið sama.

„Það er rétt að sveitarfélögin bara virðast núna öll fara sér hægt í leyfisveitingarferlum, sem er mikið áhyggjuefni,“ segir forstjóri Landsvirkjunar.

Í Búrfellslundi neðan Sultartangastíflu er gert ráð fyrir allt að þrjátíu vindmyllum með allt að 120 megavatta afli.Landsvirkjun

Í viðtali við oddvita Skeiða- og Gnúpverjahrepps kom fram að þetta væri til að knýja á um að sveitarfélög fengju hærri tekjur af orkumannvirkjum.

„Sveitarfélögin hafa náttúrlega lögbundna skyldu að sinna skipulagsvinnu, sem þeim ber að gera. Og það er afar miður að þau virðast vera að blanda saman ágreiningi við ríkið um tekjustofna sveitarfélaga, sem er mjög óheppilegt.

Ég bara skora á sveitarfélögin að sinna sinni lögbundnu skyldu.“

Úrskurðarnefnd umhverfis- og auðlindamála ógilti virkjunarleyfi fyrir Hvammsvirkjun fyrir tveimur vikum.Landsvirkjun

Og forstjórinn varar við því að það geti stefnt í alvarlegan orkuskort. Samfélagið þurfi meiri raforku.

„Kerfið er fullnýtt og við erum að horfa á það að það er veruleg aukning framundan vegna orkuskipta og vegna vaxtar í samfélaginu.

Þannig að ef ekki verður losað um þessi verkefni mun verða hérna mjög erfið staða 2026-7, sem mun verða mjög erfitt fyrir samfélagið,“ segir Hörður

En hvað um aðra virkjanakosti?

„Þessir kostir sem við höfum eru þeir sem eru komnir lengst. Það að taka aðra kosti fram, sem eru ekki komnir í gegnum rammaáætlun, er ekki hægt, og þeir standa þá fast annarsstaðar.

Þannig að það eru þessir kostir sem verða að fara áfram ef við ætlum að fá orku hérna 2026 til 2028 í kerfið,“ svarar forstjórinn.

Hér má sjá frétt Stöðvar 2:

Hér má heyra oddvita Skeiða- og Gnúpverjahrepps setja Landsvirkjun stólinn fyrir dyrnar:

Orkumál Landsvirkjun Vindorka Vatnsaflsvirkjanir Jarðhiti Orkuskipti Umhverfismál Skipulag Skeiða- og Gnúpverjahreppur Rangárþing ytra Sveitarstjórnarmál Ríkisstjórn Katrínar Jakobsdóttur

Tengdar fréttir

Búrfellslundur settur í bið og óvissa um Hvammsvirkjun

Uppbygging vindorkuvera hérlendis er í uppnámi eftir að Skeiða- og Gnúpverjahreppur setti Búrfellslund, sem Landsvirkjun áformar, í biðstöðu. Sveitarstjórnin hyggst með þessu knýja á um að sveitarfélög og nærsamfélög fái hærri tekjur af orkuverum.

23. júní 2023 09:54

Segir að einfalt ætti að vera að fá heimild fyrir Hvammsvirkjun

Forstjóri Landsvirkjunar segir að það ætti að vera tiltölulega einfalt mál að fá aftur virkjunarleyfi fyrir Hvammsvirkjun, aðeins hafi vantað samtal milli tveggja ríkisstofnana. Hann gagnrýnir úrskurðarnefnd fyrir að fella leyfið úr gildi og koma þannig í veg fyrir að mikilvægar framkvæmdir hefjist í sumar.

28. júní 2023 21:30

Umhverfisráðherra segir Íslendinga ekki geta beðið eftir grænni orku

Umhverfis- og orkumálaráðherra segir útilokað að bíða með öflun grænnar orku á Íslandi ef Íslendingar ætli að ná markmiðum sínum í loftslagsmálum. Nú verði kannað hvað fór úrskeiðis við virkjanaleyfi Hvammsvirkjunar og það megi ekki taka langan tíma. Laga þurfi umsóknarferli vegna virkjana án þess að gefa eftir í umhverfismálum.

16. júní 2023 19:20

Virkjunarleyfi Hvammsvirkjunar fellt úr gildi

Úrskurðarefnd umhverfis- og auðlindamála hefur fellt virkjunarleyfi Orkustofnunar vegna Hvammsvirkjunar úr gildi á grundvelli vatnatilskipunar.

15. júní 2023 16:10

Landsvirkjun áformar meiri orkuöflun á fjórum stöðum

Ný orkuöflun Landsvirkjunar stefnir í að verða mjög umfangsmikil á næstu árum, að sögn forstjórans. Auk Hvammsvirkjunar áformar fyrirtækið stækkun virkjana á Þeistareykjum og við Sigöldu sem og vindorkulund við Búrfell.

6. desember 2022 11:12

Segir óábyrgt að leysa orkuskiptin með því að flytja framleiðslu annað

Ekki verður sérstaklega virkjað vegna nýrrar stóriðju, að mati forstjóra Landsvirkjunar, sem segir orku nýrra virkjana fremur fara til fjölbreytts hóps smærri fyrirtækja sem og til orkuskipta.

25. febrúar 2023 22:20

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.