Prettyboitjokko grátbað um annað lag

Útsetningarstjórinn og lagahöfundurinn Ingimar Birnir Tryggvason er maðurinn á bakvið tónlistarmanninn, en hann á mikinn þátt í velgengni söngvarans. Sjálfur hefur Ingimar unnið með listamönnum víðs vegar að.

„Ég hef starfað með tónlistarfólki í Los Angeles, Nashville, Atlanta og fleiri stöðum en samstarf okkar Patta hófst þegar ég var nýkominn heim frá LA. Frændi minn sagðist þekkja gæja sem vildi gera tónlist og verða stjarna. Áður en ég vissi af hafði verið stofnuð grúppa með mér, frænda mínum og Patta þar sem hann heimtaði að fá tíma með mér í stúdíóinu.

Hann hreinlega tróð sér þangað inn en í fyrsta skiptið sem við hittumst sagðist hann vilja gera eitthvað nýtt. Mér leist vel á pælinguna en eftir að hafa hlustað á hann hugsaði ég, djöfull er hann ruglaður.

Ég fann samt fljótt á mér að það væru einhverjir töfrar í gangi. Ég dýrkaði hvað hann var til í allt og mætti á hvaða tíma sólarhringsins sem var til þess að búa til meiri tónlist. Hann notaði endalaust orðið„tjokkó“ þegar hann talaði við mig og á endanum spurði ég hvað það eiginlega þýddi. Þaðan spratt hugmyndin um Prettyboitjokko eða PBT. 

„Áttaði mig á því þarna að ég væri ekkert á leiðinni aftur út til LA“

Þegar samnefnt lag kom út varð ég fullviss um að það yrði eitthvað úr þessum gæja og að ég vildi hjálpa honum við það. Ég landaði á sama tíma tækifæri í LA og sagði við Patta að ég gæti ekki unnið með honum í bili en hann grátbað mig um að gera eitt lag með sér í viðbót. Þarna voru þrír dagar í brottför mína. 

Ég spilaði á píanóið nokkra hljóma og hann byrjaði strax að raula. Hálftíma síðar varð lagið Hiti á klúbbnum til og ég reyndi mitt allra besta að finnast það ekki gott svo ég kæmist til LA. En það var bara ekki möguleiki. Daginn eftir hitti Patti Loga, eða Luigi eins og hann kallar sig, í hádegismat og sagðist vera að vinna á fullu í tónlist. Klukkutíma síðar voru þeir báðir mættir til mín í stúdíóið. Logi söng sinn part í laginu Hiti á klúbbnum örfáum mínútum síðar. Þá áttaði ég mig á því að ég væri ekkert á leiðinni aftur út til LA.

„Áhugi og hlustun á PBT fór mjög fljótt framar öllum væntingum en í gær kom út fyrsta smáskífan þar sem Ingimar sá um útsetningu fjögurra af fimm laga ásamt því að aðstoða við laglínur, texta og hljóðblöndun. Hann segir þó erfiðast í verkferlinu hafa verið samstarfið á milli þeirra félaga Patta og Luigi.

„Þeir eru frábærir listamenn en ómögulegir saman í stúdíói. Oft fór vinna mín sem útsetningarstjóri miklu frekar í að stofna til friðar á milli þeirra en að vinna mína vinnu því það er alvöru keppni þarna á milli. Logi fær svo mikið af hugmyndum sem honum langar að koma út en Patti þarf að lifa sig inn í allt. Þeir sættast þó alltaf á endanum en þetta getur tekið á. Sagan endurtók sig svo þegar við settum saman annað lag nýverið, þeir fóru alveg í hund og kött, en allt fór að lokum vel og lagið mun trylla þjóðina í sumar.“

Í gær kom fyrsta smáskífa Prettyboitjokko út og nefnist hún PBT. Viðtökurnar hafa verið góðar en öll lögin af smáskífunni tróna á toppi vinsældarlista Spotify þessa stundina.