Féllust í faðma þegar ráðherra fól þeim lykilinn að Eddu

Gríðarleg eftirvænting hefur ríkt hjá áhugafólki um íslensku um að fá að heimsækja þetta glænýja heimili íslenskunnar sem mun hýsa einhverjar verðmætustu eigur þjóðarinnar, gömlu handritin.

Aðdragandinn hefur verið langur en hugmyndin um slíkt hús kom fyrst fram fyrir rúmum tveimur áratugum en efnahagshrunið setti strik í reikninginn og á tímabili var lóðin uppnefnd „hola íslenskra fræða“ en í dag rættist loksins draumurinn um hús undir íslensk fræði, handrit, nám, miðlun og kennslu.

Guðrún Nordal, forstöðumaður Stofnunar Árna Magnússonar í íslenskum fræðum, var að vonum himinlifandi með daginn en þau Guðrún og Jón Atli Benediktsson, rektor HÍ, féllust í faðma þegar Lilja Dögg Alfreðsdóttir afhenti þeim lykilinn að Eddu.

„Nú er hægt að safna saman öllum kröftunum í þessu húsi og hægt að búa til deiglu fyrir íslensk fræði en þetta er ekki bara fyrir rannsóknastarf heldur líka miðlunarstarf; taka á móti gestum til að skoða handritin, miðla gögnum og vinna saman,“ segir Guðrún.

En hvers konar starfsemi mun fara fram í Eddu?

„Það er kennsla, það eru rannsóknir, það er nýsköpun, skapandi skrif, það er tungumálið og skjól fyrir fræðimenn sem vinna að íslenskum fræðum um allan heim, þeir koma þá hingað. Hér erum við komin með miðstöð íslenskra fræða í heiminum. Nú erum við komin með þann stað, hann var ekki til áður. Við finnum bara að möguleikarnir eru að opnast og tækifærin. Nýir hlutir munu gerast,“ segir Guðrún.

Efnt var til nafnasamkeppni en það kom menningar-og viðskiptaráðherra á óvart hversu mikinn áhuga almenningur sýndi húsinu en alls bárust 1580 tillögur. Ein af tillögunum var að húsið yrði nefnt í höfuðið á Altúngu í Birtíngi eftir Voltaire. Þá var einnig stungið upp á nöfnunum Fold og Von en nefnd sem var skipuð til að velja nafnið var hrifnust af Eddu.

Þrjár Eddur stigu á svið í dag í tilefni af nafngiftinni og sögðu frá uppruna nafnsins Edda. Sú sem er sex ára, sagðist aðspurð, pæla mikið í íslensku og lesa mikið. Hún sagðist þá handviss um að hún muni koma oft í heimsókn í framtíðinni og er glöð með að hafa eignast nýja nöfnu.

Bragi Valdimar Skúlason, textasmiður, tónlistarmaður og íslenskufræðingur var himinlifandi með áfangann.

„Við verðum að hugsa vel um tungumálið. Þetta er lykillinn að því sem við erum, og því sem við vorum. Íslenskan geymir allar okkar hugsanir, það hefur hún gert hingað til og vonandi áfram. Þetta er bara partur af því að passa upp á hver við erum og sjálfsmyndina.“

Ætlarðu að koma oft í heimsókn?

„Já, ég var nú bara að hugsa um að fara að skrá mig í framhaldssnám, þetta er svo flott,“ segir Bragi og skellir upp úr.