„Hefur þetta je ne sais quoi sem þú þarft til þess að vinna Eurovision“

Ísak Pálmason formaður FÁSES var meðal þeirra sem tók á móti Diljá Pétursdóttur Eurovisionfara Íslands á Kex Hostel í gærkvöldi. FÁSES liðar hafa undanfarin ár haft það sem hefð að kveðja Eurovision keppanda Íslands með virktum áður en haldið er utan í aðalkeppnina.

„Það var mjög góð stemning. Þetta er fjölskylduviðburðurinn okkar,“ segir Ísak en fjöldi barna var á staðnum og gleði í loftinu. Ísak segir Diljá hafa farið á kostum.

„Eins og alltaf. Hún er þvílík orkubomba og tók lagið fyrir okkur. Hún var svo einlæg og var himinlifandi yfir því að við kynnum öll textann. Það hefur náttúrulega verið bilað að gera hjá henni að ferðast út um alla Evrópu að kynna lagið,“ segir Ísak.

Trúir á kraft Diljár

Diljá hefur verið spáð misgóðu gengi af veðbönkum. Sem stendur er henni spáð 25. sæti, sé tekið mið af vef EurovisionWorld þar sem spár veðbanka eru teknar saman. Þá eru stuðlar heldur ekki með Diljá í liði í undankeppninni.

Diljá verður sú sjöunda á svið á seinna undanúrslitakvöldinu og ef marka má spár veðbanka mun hún ekki komast áfram en á sama vefsvæði EurovisionWorld er henni spáð 14. sæti.

„Veðbankarnir eru bara í besta falli góður samkvæmisleikur hjá aðdáendum, svo ég vitni nú í þekktan stjórnmálamann,“ segir Ísak hlæjandi. Hann er fullur bjartsýni á gengi Diljáar og nefnir sem dæmi að veðbankar hafi spáð Grétu Salóme öruggri áfram fyrir Íslands hönd árið 2016.

„Og við vitum hver örlög hennar urðu,“ segir Ísak og bætir því við að gjarnan megi finna slagsíðu meðal veðbankanna þar sem halli gjarnan á minni þjóðir.

„Það sem skiptir líka öllu máli í Eurovision eru þessar þrjár mínútur sem þú hefur í sjónvarpinu. Diljá þarf að negla það móment. Við erum mjög bjartsýn!“

Fyrrverandi sigurvegurum ekki gengið vel

Í gærkvöldi var jafnframt greint frá því hvernig FÁSES greiðir atkvæði í árlegri könnun meðal félaga í aðdáendaklúbbum Eurovision.

Þar fær finnski rapparinn og söngvarinn Käärijä með lagið Cha Cha Cha tólf stig en sænska júrógoðsögnin Loreen og lagið Tattoo tíu stig. Veðbankar spá hinni síðarnefndu sigri en finnski rapparinn fylgir henni fast á eftir.

„Eurovision hefur ekki endilega verið gott fyrir fyrrum keppendur,“ segir Ísak spurður um stigagjöf FÁSES

„Auðvitað eru dæmi um að fyrrverandi keppendur hafi unnið, Dima Bilan og Helena Paparizoue en það er bara Johnny Logan sem hefur tekist að keppa tvisvar og vinna í bæði skiptin sem flytjandi.“

Ísak tekur hinsvegar fram að lag Loreen sé gott og hafi alla burði til að vinna keppnina. „En Finninn á hug okkar og hjörtu,“ segir Ísak hlæjandi.

„Ég held að ég tali fyrir FÁSES liða heilt yfir þegar ég segi að það eru allir að spá í því hvernig er hægt að gera grænan búning eða hvernig maður finni minjagripi tengda Käärijä.“

Mögulega svipuð úrslit og 2016

Hann segir rapparann einfaldlega hafa slegið í gegn með ótrúlegum persónutöfrum á samfélagsmiðlum. „Hann er þvílíkur karakter og svo áhugaverður með sína finnsku frasa.“

Käärijä sé í raun alter egó rapparans og mannsins sem standi á sviði. „Ég held hann geri í því að ýkja sig upp á næsta stig þegar hann bregður sér í karakter. Hann hefur þetta je ne sais quoi sem þú þarft til þess að vinna Eurovision.“

Ísak bætir því við að Loreen hafi það vissulega líka. „En við höfum séð það hjá henni áður og þá er þetta ekki eins spennandi og það bítur ekki eins mikið á agnið hjá aðdáendum,“ segir Ísak.

Hún sé með týpískt sænskt lag sem muni slá í gegn. „Því mun ganga vel hjá dómnefndunum og það er spurningin hversu hátt þessi atriði enda hjá dómnefndum og í símakosningunni. Þarna getur verið að við séum að horfa upp á úrslit eins og 2016, sem eru fleiri dæmi um í sögunni, þar sem mögulega verður misræmi á milli dómnefnda og símakosninga sem gerir það að verkum að atriði í öðru eða þriðja sæti geta unnið.“

Ísak segist geta lofað því að keppnin verði æsispennandi. „Þetta verður bilaðslega skemmtileg og spennandi sjónvarpsútsending í maí. Þetta er galopið.“