Skólahald fellt niður til miðvikudags vegna rakaskemmda

Vésteinn Örn Pétursson skrifar 2. febrúar 2023 21:01

Mygla hefur greinst á nokkrum stöðum í Flataskóla. Vísir/Sigurjón

Stjórn grunnskólans Flataskóla í Garðabæ hefur ákveðið að fella niður skólahald í skólanum til næsta miðvikudags. Ástæðan er rakaskemmdir.

Þetta kemur fram í tölvupósti sem Ágúst Frímann Jakobsson skólastjóri sendi á forráðamenn allra nemenda við skólann. Þar kemur fram að nú liggi fyrir niðurstöður úr flestum sýnum sem tekin hafi verið vegna rakaskemmda í skólanum.

Sjá einnig: Hluti nemenda haldi sig heima og aðrir komi með nesti vegna myglu

„Ákveðið hefur verið að loka nokkrum skólastofum og kennaraaðstöðu vegna rakaskemmda. Niðurstöður DNA ryksýnasýni í skólanum koma almennt vel út. Hægt er að ráðast í minni viðgerðir á nokkrum stöðum mjög fljótlega en aðrar verða umfangsmeiri og munu taka lengri tíma,“ segir í póstinum.

Því hafi verið ákveðið, í samráði við bæjarskrifstofu Garðabæjar, að loka skólanum til næsta miðvikudags, 8. febrúar. Þannig fáist ráðrúm til að endurskipuleggja skólastarfið og tryggja öryggi nemenda og starfsfólks. Eins sé ljóst að loka þurfi ákveðnum álmum skólans um óákveðinn tíma.

Reyna að nýta vetrarfríið

Vetrarfrí í grunnskólum Garðabæjar hefst 13. febrúar en í póstinum segir að allt kapp verði lagt á að nýta fríið í framkvæmdir á rýmum sem eru lítillega skemmd, svo skólastarf geti hafist þar sem fyrst. Þá verði lögð sérstök áhersla á að raska sem minnst starfsemi yngstu bekkjardeilda.

„Fyrir liggur að hægt er að flytja eldri bekki í færanlegar kennslustofur skömmu eftir vetrarfrí, í Miðgarð og til skoðunar eru fleiri lausnir. Næstu dagar fara í nánari útfærslu þess og verða starfsmenn og forráðamenn upplýstir við fyrsta tækifæri. Við vinnum áfram náið með verkfræðistofunni Mannvit og munu þau útfæra framkvæmdaáætlun fyrir Flataskóla.

Um leið og við þökkum ykkur fyrir skilning og góð samskipti við þessar flóknu aðstæður gerum við okkur grein fyrir því að þetta er talsvert inngrip inn í líf nemenda, en við erum sannfærð um að við komumst í gegnum þetta með samhentu átaki allra þeirra sem starfa og læra í Flataskóla.“

Boðað hefur verið til fundar fyrir forráðamenn næstkomandi þriðjudag, 7. febrúar, í salnum á Sveinatungu á Garðatorgi. Þar verði farið yfir málin og upplýst um breytingar á skólastarfinu. Fundinum verður einnig streymt beint á netinu.

Hér að neðan má sjá póstinn í heild sinni:

Kæru forráðamenn

Við höfum nú fengið niðurstöður úr flestum sýnum sem tekin voru vegna rakaskemmda i Flataskóla, en þær bárust seinnipartinn í dag fimmtudag. Ákveðið hefur verið að loka nokkrum skólastofum og kennaraaðstöðu vegna rakaskemmda. Niðurstöður DNA ryksýnasýni í skólanum koma almennt vel út. Hægt er að ráðast í minni viðgerðir á nokkrum stöðum mjög fljótlega en aðrar verða umfangsmeiri og munu taka lengri tíma.

Við höfum, í samráði við bæjarskrifstofuna, ákveðið að loka skólanum til miðvikudagsins 8.febrúar til að hafa ráðrúm til þess að endurskipuleggja skólastarfið og tryggja öryggi nemenda og starfsfólks. Ljóst er að loka þarf ákveðnum álmum í skólanum í óákveðinn tíma.

Frístund opnar aftur með breyttu sniði frá og með þriðjudegi. Hún verður í rými í Ásgarði. Nánari upplýsingar um það síðar.

Nokkrum rýmum hefur þegar verið lokað í skólanum, en nýjar niðurstöður sýna rakaskemmdir, myglu eða mengun í eftirfarandi rýmum:

Suðurálma: Gangur, heimilisfræðistofa og stofa S-220 (5. b. stofa Margrétar)

Austurálma: Stofa A-206 (1.b stofa Svanhvítar)

Vesturálma: Kaffistofa starfsfólks og skrifstofa námsráðgjafa

Norðurálma: Inngangur á norðurhlið, geymsla við myndmenntastofu og snyrting í stofu N-119 (stofa var þegar lokuð)

Þriðjudaginn 7. febrúar klukkan 17:00 verður haldinn opinn fundur fyrir forráðamenn í salnum Sveinatungu á Garðatorgi til að fara yfir málin og upplýsa um breytingar á skólastarfinu. Fundurinn verður einnig í beinu streymi.

Næstu skref:

Skólastarf hefst aftur í Flataskóla á miðvikudag.

Á mánudag klukkan 11:00 verður fyrsti samráðsfundur foreldra, starfsmanna og stjórnenda klukkan. Foreldrafélagið er beðið um að senda tvo fulltrúa á fundinn sem verður haldinn á Teams. Hann sitja tveir fulltrúar foreldrafélagsins, tveir fulltrúar starfsmanna, Ágúst skólastjóri og fulltrúar bæjarins.

Frístund verður opin, með breyttu sniði, frá klukkan 13-17 frá og með þriðjudegi fyrir nemendur sem þar eru skráðir.

Frístundabíll mun ganga samkvæmt áætlun.

Starf leikskóladeildar er óbreytt í Urriðabóli.

Húsgögn og gögn verða þrifin á næstu dögum samkvæmt leiðbeiningum Mannvits.

Vetrarfrí hefst 13. febrúar í Garðabæ. Allt kapp er lagt á að nýta vetrarfríið til að fara í framkvæmdir á rýmum sem eru lítillega skemmd svo hægt sé að hefja þar aftur skólastarf. Lögð er áhersla á að raska sem minnst starfsemi hjá yngstu bekkjardeildunum.

Fyrir liggur að hægt er að flytja eldri bekki í færanlegar kennslustofur skömmu eftir vetrarfrí, í Miðgarð og til skoðunar eru fleiri lausnir. Næstu dagar fara í nánari útfærslu þess og verða starfsmenn og forráðamenn upplýstir við fyrsta tækifæri. Við vinnum áfram náið með verkfræðistofunni Mannvit og munu þau útfæra framkvæmdaáætlun fyrir Flataskóla.

Um leið og við þökkum ykkur fyrir skilning og góð samskipti við þessar flóknu aðstæður gerum við okkur grein fyrir því að þetta er talsvert inngrip inn í líf nemenda, en við erum sannfærð um að við komumst í gegnum þetta með samhentu átaki allra þeirra sem starfa og læra í Flataskóla.

Við munum senda upplýsingapósta mjög reglulega næstu daga og sjáumst svo á fundi á þriðjudag.

Garðabær Grunnskólar Skóla - og menntamál Börn og uppeldi Mygla

Tengdar fréttir

Hluti nemenda haldi sig heima og aðrir komi með nesti vegna myglu

Niðurstöður úr sýnatökum í Flataskóla í Garðabæ benda til þess að loka þurfi nokkrum rýmum í skólanum til viðbótar vegna myglu. Nemendur í þriðja og sjöunda bekk þurfa að halda sig heima næstu tvo daga og aðrir nemendur þurfa að taka með nesti vegna lokunar mötuneytis skólans.

23. janúar 2023 20:15

Skýrslan sem hvarf

Samfélag byggir á trausti. Við treystum því að hagsmunir okkar séu varðir af þeim sem kjörnir eru til ábyrgðarstarfa á opinberum vettvangi og að yfirvöld séu traustsins verð, ekki síst þegar kemur að heilsu barnanna okkar. Á haustdögum, eftir að jarðvegssveppur fannst í Miðgarði, lagði Garðabæjarlistinn fram ítarlega fyrirspurn um viðbrögð og forvarnir bæjarins við raka- og mygluskemmdum.

17. janúar 2023 17:31

Mest lesið

Fleiri fréttir