Fótbolti

41 árs Zlatan stefnir á endurkomu í næsta mánuði

Valur Páll Eiríksson skrifar
Zlatan hefur fylgst með úr stúkunni á þessari leiktíð.
Zlatan hefur fylgst með úr stúkunni á þessari leiktíð. Piero Cruciatti/Anadolu Agency via Getty Images

Svíinn Zlatan Ibrahimovic er ekki dauður úr öllum æðum þrátt fyrir háan aldur. Hann er við það að snúa aftur eftir krossbandsslit á nýju ári en hann verður 42 ára gamall næsta haust.

Zlatan var 39 ára gamall þegar hann endursamdi við AC Milan á Ítalíu eftir tveggja ára dvöl í Los Angeles í Bandaríkjunum hvar hann skoraði 53 mörk í 58 deildarleikjum með LA Galaxy.

AC Milan hafði ekki unnið ítalskan meistaratitil frá því að Zlatan var síðast frá félaginu árið 2011 og hann lofaði að hjálpa félaginu að endurheimta titilinn. Hann stóð við það og óhætt er að segja að hann hafi lagt allt í sölurnar.

Hann hafði spilað með slitið krossband mánuðum saman þegar hann loks fór í aðgerð síðasta vor, skömmu eftir að AC Milan hafði tryggt sér sinn fyrsta titil í ellefu ár.

Margur bjóst við að Zlatan vildi enda ferilinn á titlinum, takandi til greina að hann væri kominn yfir fertugt og með krossbandið slitið. Sá var ekki á því og stefnir nú á endurkomu á völlinn fyrir janúarlok.

A-deildin á Ítalíu hefur göngu sína á ný þann 4. janúar en líklega sést Zlatan ekki á vellinum fyrr en undir lok mánaðarins.

AC Milan hefur gengið ágætlega í titilvörninni en liðið er í öðru sæti deildarinnar með 33 stig. Napoli hefur hins vegar verið langbesta lið deildarinnar og hefur aðeins tapað fjórum stigum eftir 15 umferðir og situr á toppnum með 41 stig.

Ítalski boltinn, Serie A, er á Stöð 2 Sport en upplýsingar um útsendingar má finna hér. Serie A er hluti af Stöð 2 Sport erlent sem kostar 3.990 krónur á mánuði en einnig má kaupa útsendingar sem stakan viðburð á 990 krónur.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.