Fótbolti

Mbappé misbýður bjórinn og neitar að auglýsa Budweiser

Valur Páll Eiríksson skrifar
Mbappé hefur í bæði skiptin sem hann hefur verið valinn maður leiksins snúið bikarnum með þessum hætti svo að Budweiser merkið sjáist ekki.
Mbappé hefur í bæði skiptin sem hann hefur verið valinn maður leiksins snúið bikarnum með þessum hætti svo að Budweiser merkið sjáist ekki. Mark Metcalfe - FIFA/FIFA via Getty Images

Kylian Mbappé hefur vísvitandi neitað að auglýsa bandaríska bjórframleiðandann Budweiser í kringum heimsmeistaramótið í Katar. Hann neitar að auglýsa heilsuspillandi vörur.

Mbappé hefur tvisvar á mótinu fengið verðlaun sem maður leiksins en þau eru greidd af Budweiser og er framleiðandinn merktur á rauðan bikar sem bestu leikmenn hvers leiks fá. Mbappé hefur í bæði skiptin snúið bikarnum við fyrir myndatöku, til að sýna ekki merki Budweiser.

Samkvæmt franska miðlinum L'Equipé er þetta hluti af hans ímyndarvinnu en sá franski er meðvitaður um hlutverk sitt sem fyrirmynd fyrir fjölda ungs fólks víða um heim og neitar því að samsama sig við alkóhól, ruslfæði eða veðmálafyrirtæki.

Hann lenti í útistöðum við franska knattspyrnusambandið fyrr á þessu ári vegna auglýsingar landsliðsins fyrir skyndibitastaðinn KFC, auk fleiri fyrirtækja, af þessum sökum.

Leikmenn sem hljóta verðlaunin sem maður leiksins eru skyldugir til að veita viðtal en áður hefur athygli verið vakin á því að franska knattspyrnusambandið hafi sætt sektum þar sem Mbappé neitaði að veita slík viðtöl. Hann sagði þá ætla að greiða slíkar sektir sjálfur.

Mbappé hefur verið á meðal betri leikmanna mótsins og er markahæstur með fimm mörk, tveimur á undan næstu mönnum.

Frakkland á titil að verja frá árinu 2018 og mætir Englandi í 8-liða úrslitum mótsins á laugardagskvöld.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.