Fótbolti

Mögulega vítakeppnir í riðlum á næsta HM

Sindri Sverrisson skrifar
Lionel Messi klikkaði á vítapunktinum á HM í gær en það kom ekki að sök. Mögulega verða vítaspyrnukeppnir í riðlakeppninni á næsta HM en ólíklegt er að Messi spili þar.
Lionel Messi klikkaði á vítapunktinum á HM í gær en það kom ekki að sök. Mögulega verða vítaspyrnukeppnir í riðlakeppninni á næsta HM en ólíklegt er að Messi spili þar. Getty/Pawel Andrachiewicz

FIFA, alþjóða knattspyrnusambandið, er með til skoðunar að notast við vítaspyrnukeppni verði jafntefli í leikjum í riðlakeppni á næsta heimsmeistaramóti karla, sem fram fer árið 2026.

Á HM 2026 mun þátttökuþjóðum fjölga úr 32 í 48 og til stendur að spilað verði í sextán þriggja liða riðlum, þar sem tvö lið komast áfram úr hverjum riðli í 32-liða útsláttarkeppni. Þó er enn ekki útilokað að spilað verði í fjögurra liða riðlum.

Ætla má að mikil hætta verði á því að lið verði jöfn að stigum í þriggja liða riðlum og því spurning hvernig best væri að skera úr um sætaröðun.

The Athletic greinir frá því að ráðamenn hjá FIFA íhugi nú að notast við vítaspyrnukeppni og að sigurlið í vítaspyrnukeppni, eftir jafnteflisleik, fengi þá eitt aukastig. Miðillinn segir jafnframt að til skoðunar sé að þessar vítaspyrnukeppnir verði fyrir leik en ekki eftir leik, og segir að með því megi minnka líkur á hagræðingu úrslita.

Á HM karla hafa 32 lið keppt í átta fjögurra liða riðlum frá og með HM í Frakklandi 1998 en mótið sem nú stendur yfir í Katar verður síðasta mótið með þessu fyrirkomulagi.

Sætafjöldi UEFA, knattspyrnusambands Evrópu, á HM eykst hlutfallslega minnst í samanburði við önnur álfusambönd. Ísland mun berjast við önnur Evrópulönd um 16 laus sæti á HM í stað 13 áður. Afríka fær 9 örugg sæti, Asía 8, Suður-Ameríka 6, Norður- og mið-Ameríka 6 og Eyjaálfa 1 sæti. Sex lið, frá öllum öðrum heimsálfum en Evrópu, munu svo spila um tvö síðustu sætin í umspili.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.