Bíó og sjónvarp

Pené­lope boðið í Bíó Para­dís

Vésteinn Örn Pétursson skrifar
Óskarsverðlaunaleikkonan Penélope Cruz er á meðal þeirra sem tilnefnd eru á hátíðinni. Það kann því að fara svo að hún verði á Íslandi innan skamms.
Óskarsverðlaunaleikkonan Penélope Cruz er á meðal þeirra sem tilnefnd eru á hátíðinni. Það kann því að fara svo að hún verði á Íslandi innan skamms. Pablo Cuadra/Getty

Evrópskur kvikmyndagerðamánuður hefst í kvöld en hápunktur mánaðarins eru evrópsku kvikmyndagerðaverðlaunin sem haldin verða í Hörpu í desember. 

Rætt var við leikstjórann Baltasar Kormák og Hrönn Sveinsdóttur, framkvæmdastjóra Bíó Paradísar, í beinni útsendingu í kvöldfréttum Stöðvar 2 í kvöld. Hrönn segir að á næstu dögum verði boðið upp á allar bestu evrópsku kvikmyndir síðasta árs í kvikmyndahúsinu. Um sé að ræða fjölbreytta flóru.

„Fólk heldur að þetta séu bara listrænar, dramatískar myndir. En á miðvikudaginn erum við til dæmis að opna spænska gamanmynd sem er tilnefnd sem besta spænska myndin. Þá er frítt inn fyrir alla og við bjóðum upp á Evu Ruzu, spænskt rauðvín, og besta spænska karlpeninginn sem til er,“ sagði Hrönn og átti þar við leikarann Javier Bardem. 

„Við ætlum að sýna allar þessar myndir og allt sem er tilnefnt og þetta nær svo hápunkti þegar verðlaunin verða afhent í Hörpu,“ sagði Hrönn.

Baltasar Kormákur var mikill talsmaður þess að hátíðin yrði haldin hér á landi. Hann segir bæði um heiður og tækifæri að ræða.

„Til þess að fá evrópska kvikmyndagerðarmenn, kynnast þeim og vera hluti af evrópska kúltúrnum. Ég er í stjórn evrópsku kvikmyndaakademíunnar og það var mitt helsta markmið. Þetta átti að gerast fyrir tveimur árum en þá var auðvitað Covid. En núna verður þetta geggjað, Harpa verður undirlögð og ég er að vona að allir, bæði kvikmyndagerðarmenn og almenningur, fái að njóta. Hluti af því er að koma hér í Bíó Paradís, sjá þessar myndir, vera hluti af þessari umræðu og taka þátt í hátíðarhöldunum.“

Stjörnufans meðal tilnefndra

Evrópsku kvikmyndaverðlaunin eru haldin árlega, þar af annað hvert ár í Berlín, höfuðborg Þýskalands. Þess á milli er hátíðin haldin í hinum ýmsu borgum Evrópu og nú er komið að Reykjavík.

Í tilkynningu frá skipuleggjendum kemur fram að hátíðin hefjist raunar í kvöld, þar sem opnunarmynd hennar verður sýnd í Bíó Paradís. Í aðdraganda verðlaunanna, sem verða veitt í Hörpu 10. desember næstkomandi, verða sýndar myndir sem tilnefndar eru á hátíðinni í kvikmyndahúsinu. 

„Það má eiga von á því að margir þekktir leikstjórar og leikarar muni sækja landið heim þegar verðlaunaafhendingin fer fram í desember,“ segir í tilkynningunni. Þar er sérstaklega nefndur til sögunnar breski leikarinn Kenneth Branagh, sem tilnefndur er fyrir besta handritið fyrir myndina BELFAST. Auk hans er spænska ofurstjarnan Penélope Cruz tilnefnd fyrir leik sinn í myndinni Parallel Mothers. 

Þá hefur sænski leikstjórinn Ruben Östlund sópað að sér tilnefningum fyrir myndina Triangle of Sadness, sem er tilnefnd sem besta evrópska myndin, auk tilnefndinga fyrir leikstjórn og handrit. 

Eins er leikarinn Elliott Crosset Hove tilnefndur sem besti evrópski leikarinn fyrir leik sinn í kvikmyndinni GODLAND, eftir leikstjórann Hlyn Pálmason. 

Í samtali við fréttastofu sögðu Baltasar og Hrönn ekki enn ljóst hver úr hópi hinna tilnefndu stjarna muni leggja land undir fót og láta sjá sig á Íslandi. Bæði vonast þau þó til þess að sjá sem flesta úr hópi tilnefndra á hátíðinni.






Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.