Fótbolti

Brynjólfur Ander­sen á skotskónum og Svein­dís Jane enn með fullt hús stiga

Runólfur Trausti Þórhallsson skrifar
Brynjólfur Andersen steig upp í dag.
Brynjólfur Andersen steig upp í dag. Kristiansund

Brynjólfur Andersen Willumsson skoraði og lagði upp í stórsigri Kristiansund í norsku úrvalsdeildinni í fótbolta í dag. Sigurinn heldur vonum liðsins um að halda sæti sínu í deildinni á lífi. Sveindís Jane Jónsdóttir og stöllur hennar í Wolfsburg eru enn með fullt hús stiga í Þýskalandi.

Kristiansund heldur í vonina um að halda sæti sínu í norsku úrvalsdeildinni eftir 4-0 sigur á Álasund í dag. Brynjólfur Andersen átti frábæran leik þar sem hann skoraði annað mark liðsins úr vítaspyrnu undir lok fyrri hálfleiks og lagði svo upp fjórða markið undir lok leiks. Brynjólfur Andersen fékk heiðursskiptingu í uppbótartíma.

Kristiansund er með 21 stig, tveimur stigum frá umspilssæti um sæti í efstu deild, þegar tvær umferðir eru eftir. 

Alfons Sampsted spilaði allan leikinn þegar Bodø/Glimt tapaði 3-2 fyrir Rosenborg. Kristall Máni Ingason var á bekk sigurliðsins. Markvörðurinn Patrik Sigurður Gunnarsson spilaði allan leikinn þegar Viking steinlá 4-1 gegn Noregsmeisturum Molde.

Wolfsburg enn með fullt hús stiga

Sveindís Jane Jónsdóttir spilaði hálftíma í 3-2 útisigri Wolfsburg á Werder Bremen. Wolfsburg var 3-1 yfir þegar hún kom inn af bekknum, heimaliðið minnkaði muninn en náði ekki að jafna metin. Wolfsburg er áfram á toppi deildarinnar með fullt hús stiga.

Glódís Perla Viggósdóttir var í hjarta varnar Bayern München sem vann 3-1 sigur á Meppen. Bayern er fimm stigum á eftir meistaraliði Wolfsburg þegar aðeins sex umferðir eru búnar af deildinni. Karólína Lea Vilhjálmsdóttir og Cecilía Rán Rúnarsdóttir voru ekki í leikmannahópi Bayern.

Hlín Eiríksdóttir skoraði sárabótamark fyrir Piteå þegar liðið tapaði 2-1 fyrir Vittsjö. Markið kom á sjöundu mínútu uppbótartíma. Piteå er í 8. sæti með 37 stig að loknum 25 leikjum.




Fleiri fréttir

Sjá meira


×