Leik­stjóri ráð­lagði Kristínu að losa sig við á­hrifa­valda­stimpilinn

„Ég komst inn alveg óvænt,“ sagði Kristín í nýjasta þættinum af Einkalífinu. Hún komst inn í leiklistarnámið í fyrstu tilraun. Hún er vön því að vera með marga bolta á lofti en hún er einstæð móðir og starfar sem leikkona, flugfreyja og samfélagsmiðlastjarna.

„Ég heyrði einu sinni einn leikstjóra segja við mig á djamminu að ég þyrfti nú að fara að fjarlægja mig þessu samfélagsmiðladæmi, þessum áhrifavaldastimpli og öllu þessu. Hann myndi persónulega ekki ráða mig í hlutverk ef að ég væri þessi týpa.“ 

Sagði hann Kristínu að samfélagsmiðlarnir væru að gjaldfella hennar persónu.

„Það tók mig svolítið úr jafnvægi.“

Myndi taka sömu ákvörðun

Henni fannst þó galið að nýta ekki tækifærin sem á samfélagsmiðlunum voru.

„Auðvitað hefði maður viljað gera margt öðruvísi í dag. Í dag er ég bara að taka að mér verkefni sem mig langar að bendla mitt nafn við. En maður gerði það ekkert alltaf.“

Myndi hún þó taka sömu ákvörðun, að blanda saman samfélagasmiðlunum og leiklistinni, ef hún ætti að velja aftur í dag. Kristín nær að sinna báðu mjög vel og er með fjölda verkefna í gegnum samfélagsmiðlana og leikur nú einnig stórt hlutverk í nýrri kvikmynd. 

„Þetta er eiginlega eins og leikverk, gerist allt á einni helgi,“ segir hún um myndina. 

Í þættinum hér fyrir neðan talar Kristín einnig um samfélagsmiðlana, móðurhlutverkið, ástina, fjölskyldu sína, heimilið, ferilinn og margt fleira.

Einfaldar týpur í raunveruleikasjónvarpi

Kristín var frá upphafi hluti af LXS áhrifavaldahópnum en tók þó ekki þátt í raunveruleikaþætti þeirra LXS sem sýndir voru á Stöð 2 í vetur. 

„Mig langaði bara að ef ég væri að fara að gera sjónvarpsþætti, að ég væri að leika í þeim, sem leikkona,“ segir Kristín um sína ákvörðun.

„Ég horfi lítið á raunveruleikaþætti og tengdi lítið við þetta form og vissi ekki hvernig ég ætti að geta nýtt mér það til góðs. Fólk tengir oft raunveruleikaþætti við einhverjar einfaldar týpur og mér fannst ég ekki tilbúin til að setja allt hjartað mitt í þetta.“

Einnig var mikið að gera hjá henni á sama tíma og þættirnir voru teknir upp. 

Kom furðulega út en ekkert drama

Kristín segist hafa verið smá hrædd við þetta.

„Ég var hrædd um að þetta myndi koma sér verr fyrir mig heldur en eitthvað gott. En svo er ég búin að horfa á þættina og þeir eru frábærir og stelpurnar skína hundrað prósent þeirra karakter.“

Glöggir áhorfendur tóku eftir því að Kristín hafði verið viðstödd tökur en var svo klippt út að mestu í eftirvinnslu svo aðeins sást í vanga hennar og handlegg í matarboði sem tekið var upp fyrir fyrsta þáttinn. 

„Auðvitað eru þetta vinkonur mínar og ég ætlaði bara að vera á kantinum ef við værum að hittast en þetta kom bara furðulega út.“

Kristín segir að það sé þó ekkert drama þar að baki og útilokar ekki að koma fram í næstu þáttaröð af LXS.