Íslenski boltinn

Kvennalið KR hafi ekki getað æft því karlaliðið var erlendis

Valur Páll Eiríksson skrifar
Kvennalið KR hefur verið mikið til umræðu síðustu daga þar sem stjórnendur félagsins eru sakaðir um metnaðarleysi gagnvart liðinu.
Kvennalið KR hefur verið mikið til umræðu síðustu daga þar sem stjórnendur félagsins eru sakaðir um metnaðarleysi gagnvart liðinu. Vísir/Hulda Margrét

Kvennalið KR var til umræðu í Bestu mörkunum á Stöð 2 Sport í gær. Þar kom fram að liðið hafi ekki getað æft á meðan karlalið félagsins var erlendis í keppnisferð. Allir með lyklavöld að KR-heimilinu hafi verið ytra með körlunum.

Töluvert hefur gustað um Knattspyrnufélag Reykjavíkur vegna meints skorts á metnaði knattspyrnudeildar félagsins fyrir kvennaliði KR sem féll um helgina úr Bestu deild kvenna.

Umræðan fór á fullt eftir 5-3 tap KR fyrir Selfossi í Bestu deild kvenna á sunnudaginn en þar meiddist Hannah Tillett, leikmaður KR. Hún lá lengi á vellinum og beið eftir sjúkrabörum sem aldrei birtust og þurftu liðsfélagar hennar að bera hana af velli þar sem KR hafði ekki mannað börurnar.

Fyrirliði KR, Rebekka Sverrisdóttir, gagnrýndi umgjörðina hjá liðinu eftir leik, sem og þjálfarinn Chris Harrington.

Páll Kristjánsson, formaður knattspyrnudeildar KR, svaraði fyrir málið í viðtali í gær þar sem hann kenndi um skorti á sjálfboðaliðum sem gerði félaginu erfitt fyrir. Þar hafi slakur árangur karla- og kvennaliðs KR í sumar sitt að segja. Erfiðlega hafi gengið að fylla í þau störf sem þurfi í kringum leiki liðsins. Hann segir þó nokkurn fjölda sjálfboðaliða hafa verið á leiknum sem um ræðir og segir ómaklegt að gagnrýna störf þeirra sem gefa vinnu sína.

Umræða sem hefur varað lengi

Þetta var hins vegar ekki í fyrsta sinn í sumar sem KR sætir gagnrýni vegna umgjarðar í kringum kvennaleiki þar sem vantaði vallarklukku og vallarþul í leik við Breiðablik í vor.

„Þessi umræða er búin að eiga sér stað í allt sumar. En getum við sett þetta á sjálfboðaliða?“ spyr þáttastjórnandinn Helena Ólafsdóttir.

„Nei. Þetta er búið að eiga sér stað miklu, miklu lengur en bara í sumar,“ segir Lilja Dögg Valþórsdóttir, fyrrum leikmaður KR.

„Ég er líka KR-ingur og mér þykir þetta ofboðslega sárt. Þetta eru bara umræður sem hafa átt sér stað í miklu lengri tíma og það er eiginlega það sem manni finnst skammarlegt – að það hafi ekki verið hægt að taka á þessu fyrr,“

Klippa: Bestu mörkin: Umræða um KR

Ódýrt að skella skuldinni á sjálfboðaliða

„Það er svo margt sem er hægt að pikka í, í þessu ferli. Það er búið að vera að gagnrýna umgjörðina í allt sumar, svo það er ekki eins og Páll kemur inn á, að þetta endurspegli íþróttir á Íslandi í dag. Ef þetta gerði það, þá værum við ekki að tala bara um KR,“ segir fyrrum landsliðskonan Harpa Þorsteinsdóttir sem vísar þar til ummæla Páls Kristjánssonar, formanns knattspyrnudeildar KR, sem kenndi skorti á sjálfboðaliðum um stöðuna.

„Í allri þessari umræðu í kringum KR finnst mér óþarflega oft verið að beina spjótum annað en heldur en þar sem ábyrgðin liggur,“ segir Harpa enn fremur.

Lilja Dögg nefnir þá að umræðan um sjálfboðaliða sé á villigötum og sammælast þær þrjár um það. Gagnrýni leikmanna og þjálfara KR sé ekki beint að sjálfsboðaliðum eða skorti þar á heldur hvernig KR hagi málum tengdum kvennaliði félagsins í fótbolta.

Æfing hafi fallið niður vegna þess að karlaliðið var erlendis

Helena bendir þá á að flestir helstu stjórnendur KR séu allir innvinklaðir í karlalið félagsins. Það leiði af sér meiri áherslu á það lið sem hafi jafnvel haft þær afleiðingar að kvennaliðinu var ófært að æfa í sumar þegar karlalið KR fór til Póllands að keppa við Pogon Szczecin í Sambandsdeild Evrópu þann 7. júlí síðastliðinn.

„Ég held að það þurfi að vera hugarfarsbreyting í Vesturbænum. Ég hef fylgst með þessu starfi lengi. Mér finnst leiðinlegt að finnast þetta en mér finnst stundum eins og kvennaboltinn sé bara fyrir. Ákveðið ykkur hvort þið ætlið að vera með þetta [kvennalið] eða ekki,“ sagði Helena.

„Maður er búinn að lesa um að það að æfingar falli niður því það vanti lykla að húsinu. Ég spyr mig aðeins um stjórnarhætti þarna. Framkvæmdastjórinn er aðstoðarþjálfari [í meistaraflokki karla], yfirmaður yngri flokka er aðstoðarþjálfari í meistaraflokki karla, íþróttastjórinn er fyrirliði meistaraflokks karla. Þegar Evrópukeppnin var þá komst [kvenna] liðið ekki á æfingu af því þessir menn voru í burtu og húsvörðurinn í sumarfríi,“ spurði Helena jafnframt.

Bjarni Guðjónsson er framkvæmdastjóri KR og aðstoðarþjálfari hjá meistaraflokki karla hjá félaginu.Vísir/Diego

Helena vísar þarna til Bjarna Guðjónssonar, sem er framkvæmdastjóri og aðstoðarþjálfari karlaliðsins, Viktors Bjarka Arnarssonar, sem er yfirþjálfari yngri flokka og aðstoðarþjálfari karlaliðs KR, og Pálma Rafns Pálmasonar sem er íþróttastjóri og fyrirliði.

„Þjálfarar meistaraflokks kvenna fá ekki lykil og æfingin gat ekki verið. Hvaða rugl er í gangi? Við vitum þetta öll, það eru allir búnir að vera að tala um þetta og þetta þarf bara að laga,“ segir Helena.

Fleira kemur fram í umræðu þeirra um KR-liðið sem má sjá í heild sinni í spilaranum að ofan.


Tengdar fréttir

Segir formanninum að mæta á leiki áður en hann tjáir sig

Hildur Björg Kristjánsdóttir, leikmaður KR, virðist vera ósátt við ummæli Páls Kristjánssonar, formann knattspyrnudeildar KR. Hildur segir Páli að mæta á leiki KR áður en hann tjáir sig um mál liðsins.

Lá sárþjáð en fékk engar börur: „Takið mig út af“

Hannah Tillett lá sárþjáð á grasinu á Meistaravöllum, heimavelli KR-inga, í tæpar fjórar mínútur í gær áður en liðsfélagar hennar héldu á henni af vellinum. Vonir standa til þess að hún hafi ekki slitið krossband í hné.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.