Tíska og hönnun

Liz Truss stelur stíl Védísar tíu árum síðar

Jakob Bjarnar skrifar
Védís rak upp stór augu þegar hún sá mynd af Liz Truss og spúsa hennar. Myndin var vægast sagt kunnugleg.
Védís rak upp stór augu þegar hún sá mynd af Liz Truss og spúsa hennar. Myndin var vægast sagt kunnugleg. aðsend

Védís Sigurðardóttir, sérfræðingur hjá Landsbankanum, rak upp stór augu þegar hún sá mynd af verðandi forsætisráðherra Bretlands í nákvæmlega sama kjól og hún átti.

„Ég var bara að googla hana. Þurfti að vita meira um nýja forsætisráðherrann?“ segir Védís hlæjandi í samtali við Vísi.

Védís var að kynna sér Liz Truss nánar en hún er nýr formaður Íhaldsflokksins og næsti forsætisráðherra Bretlands. Og rakst þá á mynd sem Liz Truss birti af sér og spúsa sínum Hugh O'Leary á Instagram-síðu sinni á Valentínusardaginn 2019.

Védísi kannaðist við myndina, fór að fletta í sínum gögnum og jú, það passaði: Það er til mynd af henni og Breka Logasyni eiginmanni hennar sem er nánast eins. Breki og Hugh eru í samskonar klæðnaði, dragfínir í smóking, sem er klassískur klæðnaður karlmanna en það sem meira er: Liz Truss er í nákvæmlega samskonar kjól og Védís. Hjónin stilltu sér í myndatöku tíu árum fyrr, eða 2009 þegar þau Védís og Breki voru stödd í brúðkaupi vinafólks. Það er því ekki hægt að komast að annarri niðurstöðu en Liz Truss hafi stolið stílnum, stíl Védísar.

„Þetta er Karen Millen-kjóll sem er breskt „brand“. Þetta var rosalega heitt á þessum tíma, þetta var dýr kjóll þá,“ grínar Védís sem finnst þetta fyrst og síðast yfirmáta fyndið. Hún segist ekki eiga kjólinn lengur, hann rann sitt skeið.

Védís birtir myndirnar á Facebook-síðu sinni við miklar undirtektir. Og spyr í galsa, og vitnar í þekkta efnisþætti í breskum miðlum, Steldu stílnum: „Who wore it better?“

Ljóst er að um er að ræða mikinn eftirlætiskjól verðandi forsætisráðherra Breta.


Tengdar fréttir

Mun venjulegri stjórnmálamaður í Downing stræti

Liz Truss er nýr formaður Íhaldsflokksins og næsti forsætisráðherra Bretlands. Hún lofar skattalækkunum á sama tíma og óðaverðbólga er í landinu og er sökuð um að vera frekar umhugað um fyrirtækjaskatt en heimilin. Eiríkur Bergmann prófessor í stjórnmálafræði segir að með valdaskiptunum sé kominn mun venjulegri stjórnmálamaður í Downing stræti.

Liz Truss verður næsti for­sætis­ráð­herra Bret­lands

Liz Truss utanríkisráðherra Bretlands bar sigur úr býtum í baráttunni um leiðtogasæti Íhaldsflokksins í Bretlandi. Niðurstöður leiðtogakjörsins voru tilkynntar nú rétt fyrir hádegi og verður Truss því næsti forsætisráðherra landsins.






Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.