Erlent

Trump vill að þriðji aðili fari yfir gögnin úr húsleitinni

Samúel Karl Ólason skrifar
Frá því Trump flutti úr Hvíta húsinu hefur hann búið í Mar-a-Lago í Flórída. Hann tók með sér mikið magn gagna og reyndist hluti þeirra leynilegur.
Frá því Trump flutti úr Hvíta húsinu hefur hann búið í Mar-a-Lago í Flórída. Hann tók með sér mikið magn gagna og reyndist hluti þeirra leynilegur. AP/Steve Helber

Donald Trump, fyrrverandi forseti Bandaríkjanna, hefur höfðað mál vegna húsleitarinnar í Mar-a-Lago, sveitarklúbbinum í Flórída þar sem Trump býr. Hann vill að utanaðkomandi aðili verði fenginn til að fara yfir gögn sem starfsmenn Alríkislögreglu Bandaríkjanna (FBI) lögðu hald á í húsleitinni.

Sá aðili myndi þá fara yfir það sem haldlagt var og leggja til hliðar þau gögn sem gætu fallið undir trúnað sem fylgir forsetaembættinu, sem á ensku kallast „executive privilege“. AP fréttaveitan segir að í eldri málum hafi dómarar sem sestir eru í helgan stein tekið að sér þetta hlutverk.

Í kröfu sem lögð var fyrir dómara í Flórída í kvöld segja lögmenn Trumps að löggæslu eigi ekki að nota sem pólitískt vopn, sem í takt við ummæli Trumps og bandamanna hans um húsleitina.

Starfsmenn FBI lögðu þann 8. ágúst hald á gögn sem fundust í Mar-a-Lago og þar á meðal leynileg gögn. Einhver hluti gagnanna var skilgreindur „Classified/TS/SCI“ en það stendur fyrir „top secret/sensitive compartmented information“ og þau gögn á eingöngu að skoða í öruggum ríkisstofnunum.

Enn er þó lítið vitað um gögnin sjálf.

Sjá einnig: Leitarheimildin byggði á grun um brot á njósnalögum

Þær vendingar áttu sér einnig stað í dag að alríkisdómarinn sem skrifaði undir húsleitarheimild FBI, gaf í skyn að hann muni mögulega opinbera hluta heimildarumsóknarinnar. Hann sagði þó nauðsynlegt að halda hlutum hennar leyndum og mögulega væri það svo stór hluti umsóknarinnar að birting hennar væri tiltölulega gagnslaus.

Til að fá heimild til húsleitar þurftu fulltrúar FBI að lýsa fyrir dómara á hverju grunurinn væri reistur. Það var gert með eiðsvarinni yfirlýsingu þar sem röksemdum og sönnunargögnum var lýst.

Dómarinn sagði í síðustu viku að hið opinbera ætti að fara yfir umsóknina og kanna hvaða hluta hennar mætti birta. Hann ítrekaði það í dag og sagði einnig að það þýddi ekki að hann hefði tekið ákvörðun enn, samkvæmt frétt New York Times.

Sjá einnig: Hálfur sigur fjölmiðla í deilu um eldfimar upplýsingar um húsleitina sögulegu

Meðal annars sagðist hann hafa áhyggjur af því að opinbera umsóknina þar sem upplýsingar þar gætu ógnað öryggi vitna sem hafi aðstoðað yfirvöld í málinu. Hægt væri að bera kennsl á viðkomandi þó nöfn þeirra kæmu ekki fram.

Dómarinn hefur sjálfur orðið fyrir fjölmörgum hótunum vegna húsleitarinnar og það sama má segja um starfsmenn FBI en dómarinn vill ekki opinbera nafn þess sem setti nafn sitt á umsóknina.


Tengdar fréttir

Heljargrip Trumps á flokknum aldrei þéttara

Ef það er einn lærdómur sem draga má af úrslitum í forvali Repúblikanaflokksins í Bandaríkjunum á undanförnum dögum, er það að Donald Trump ræður þar ríkjum. Honum er að takast að bola öllum helstu andstæðingum úr flokknum. Frambjóðendur flokksins til áhrifamikilla embætta víðs vegar um Bandaríkin hafa tekið undir lygar Trumps um að kosningasvindl hafi kostað hann sigur í forsetakosningunum 2020.

Gögnin inni­héldu upp­lýsingar um for­seta Frakk­lands

Alls voru tuttugu kassar sem innihéldu meðal annars ljósmyndir, leynileg gögn og bréf, fjarlægð af heimili Donald Trump, fyrrverandi Bandaríkjaforseta á mánudaginn. Ekki er ljóst á hverju húsleitarheimild alríkislögreglunnar var byggð en von er á að heimildin verði birt í kvöld.

Við­brögð­in sýna tang­ar­hald Trumps á Rep­úbl­ik­an­a­flokkn­um

Donald Trump, fyrrverandi forseti Bandaríkjanna, gæti mögulega verið fundinn sekur um brot á lögum sem hann sjálfur þyngdi refsinguna við töluvert. Það er að segja ef hann braut lög með því að flytja opinber gögn, og þar á meðal leynilegt gögn, með sér til Flórída þegar hann flutti úr Hvíta húsinu. Trump er sagður vera að leita sér að lögmönnum til að mögulega verja sig.

Trump-liðar kvarta undan „vopnvæðingu“ dómsmálaráðuneytisins

Rannsakendur Alríkislögreglu Bandaríkjanna (FBI) gerðu í gær húsleit í Mar-a-Lago sveitaklúbbinum í Flórída en Donald Trump, fyrrverandi forseti Bandaríkjanna, býr þar. Fjölmiðlar vestanhafs segja útlit fyrir að atlagan, sem stóð yfir frá morgni til kvölds í gær, tengist meðhöndlun Trumps og starfsmanna hans á opinberum og leynilegum gögnum.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.