Forstjórar ættu að sýna ábyrgð og lækka laun sín

Þessar hugmyndir eru nokkuð nýstárlegar komandi úr ranni atvinnurekenda.

Þannig hafa margir kannski rekið upp stór augu við lestur á pistli Ólafs Stephensen, framkvæmdastjóra Félags atvinnurekenda, sem hann birti í Viðskiptablaðinu í gær. Þar stingur hann upp á að forstjórar lækki laun sín.

„Já, ég er kannski að litlu leyti að tala inn í hóp minna fé­lags­manna í Fé­lagi at­vinnu­rek­enda. Þar eru mest lítil og meðal­stór fyrir­tæki þar sem er ekkert óhóf í gangi í launa­greiðslum stjórn­enda eða bónusum eða ein­hverju slíku,“ segir Ólafur.

Það gildi þó allt annað um stærstu fyrir­tæki landsins.

„Þar er hægt að nefna dæmi frá undan­förnum misserum um launa­hækkanir for­stjóra sem nema marg­földum verka­manna­launum, um að bónus­greiðslurnar til dæmis hjá fjár­mála­fyrir­tækjunum sem voru eigin­lega horfnar eftir hrun séu komnar aftur og arð­greiðslur séu svona býsna ríf­legar,“ segir Ólafur.

Hann vill að stjórn­endur þessara fyrir­tækja fari nú að sýna á­byrgð og skyn­semi rétt eins og at­vinnu­rek­endur biðla iðu­lega til verka­lýðs­fé­laga að gera í að­draganda kjara­samnings­við­ræðna.

Þeir hafi sýnt á­byrgðar­leysi upp á síð­kastið.

„Já, ég held að það sé hægt að telja upp nokkur axar­sköft í þessari við­kvæmu stöðu sem menn ættu að minnsta kosti að gæta sín á að endur­taka ekki,“ segir Ólafur.

Geturðu nefnt ein­hver dæmi þar?

„Ég ætla ekki að nefna neinn ein­stakan.“

Ekki innistæða fyrir nafnlaunahækkunum

Minni fyrir­tækin segir Ólafur að séu afar stressuð fyrir komandi kjara­við­ræðum en þau hafi ekki tök á launa­hækkunum í því efna­hags­á­standi sem ríkir nú.

Krafan er því ekki að for­stjórar lækki laun svo önnur laun geti hækkað - þvert á móti vill Ólafur að þetta sýni gott for­dæmi fyrir kjara­við­ræðurnar í haust.

„Það er bara svo af­skap­lega mikil­vægt að kjara­samningar sem verða gerðir á næstunni feli ekki í sér ein­hverjar inni­stæðu­lausar nafn­launa­hækkanir því þær munu bara fara beint út í verð­lagið og skerða kaup­máttinn og gera illt verra. Það mun ekki bæta neitt,“ segir Ólafur.