Íslenski boltinn

Stefán Árni ekki með gegn ÍBV vegna aga­banns

Runólfur Trausti Þórhallsson skrifar
Stefán Árni var ekki með gegn ÍBV þar sem hann var í agabanni.
Stefán Árni var ekki með gegn ÍBV þar sem hann var í agabanni. Vísir/Hulda Margrét

KR vann 4-0 sigur á ÍBV í Bestu deild karla í fótbolta á sunnudagskvöld. Athygli vakti að Stefán Árni Geirsson, sem hefur verið að koma til baka eftir meiðsli, var ekki í leikmannahóp KR. Hann var í agabanni.

Þetta staðfesti Rúnar Kristinsson, þjálfari KR, í viðtali við Fótbolti.net eftir leik. Rúnar var þögull sem gröfin er hann var spurður hvað hefði leitt til agabannsins.

Sigurinn var einkar kærkominn fyrir KR sem hafði aðeins unnið einn heimaleik í sumar áður en Atli Sigurjónsson ákvað að skella í þrennu ásamt því að Sigurður Bjartur Hallsson batt endahnút á snotra sókn í fyrri hálfleik.

Fyrir leiktíðina var búist við miklu af Stefáni Árna og hann byrjaði vel er KR vann Fram 4-1 í fyrstu umferð Bestu deildarinnar. Hann byrjaði inn á gegn Val og KA í kjölfarið en hefur síðan verið meira frá heldur en ekki. Sem stendur hefur hann aðeins komið við sögu í átta af 20 leikjum KR á leiktíðinni.

Eftir tvo sigurleiki í röð situr KR í 6. sæti Bestu deildarinnar með 24 stig að loknum 16 umferðum, sex stigum á eftir Víking í 2. sætinu en Íslands- og bikarmeistararnir eiga þó leik til góða.

Fréttin hefur verið uppfærð.


Tengdar fréttir




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.