Umfjöllun og viðtöl: Afturelding-Þróttur R. 0-2| Þróttur sigraði í Mosfellsbæ

Kristín Björk Ingimarsdóttir skrifar
Afturelding vann síðasta leik sinn fyrir EM-hlé og er fjórum stigum frá öruggu sæti.
Afturelding vann síðasta leik sinn fyrir EM-hlé og er fjórum stigum frá öruggu sæti. Vísir/Hulda Margrét

Afturelding tók á móti Þrótti í Bestu deild kvenna í fótbolta í kvöld. Afturelding er neðst í deildinni og þurfi á sigri að halda, ekki kom hann í dag þar sem Þróttur vann með tveimur mörkum. Lokatölur 0-2.

Fyrri hálfleikur var heldur tíðindalítill. Afturelding byrjaði leikinn af krafti og kom sér í góð færi á fyrstu mínútunum. Þegar rúmlega tuttugu mínútur voru liðnar af leiknum tók Þróttur við.

Þróttur voru mun öfugri restina af fyrri hálfleik og komu sér í mörg góð færi. Eva Ýr Helgadóttir, markmaður Aftureldingar var í fullri vinnu í markinu og hélt hreinu fyrir sínar konur. Hálfleikstölur 0-0. 

Það var töluvert meira líf í seinni hálfleik þrátt fyrir að hann hafi farið heldur hægt af stað. Þróttur hélt uppteknum hætti frá fyrri hálfleik og héldu þær ótrauðar áfram að skapa hættu í teig Aftureldingar. 

Þegar rúmlega 70 mínútur voru liðnar af leiknum var Murphy Alexandra Agnew á ferðinni, gefur boltann á Kötlu Tryggvadóttur sem er nánast komin aftur fyrir enda mörk en nær að pota boltanum aftur á Murphy sem rennir honum framhjá Evu Ýr Helgadóttur í marki Þróttar. Staðan 1-0. 

Þegar rúmlega tíu mínútu voru til leiksloka tekur Murphy Alexandra hornspyrnu. Boltinn endar á kollinum á Sóley Maríu Steinardóttur sem kemur honum á Ólöfu Sigríði Kristinsdóttur sem skallar boltann yfir Evu Ýr. Staðan 2-0 fyrir Þrótt. Meira gerðist ekki í þessum leik og sigraði Þróttur með tveimur mörkum. 

Afhverju vann Þróttur?

Þær spiluðu góðan fótbolta í 70 mínútur og lá mark í loftinu nánast allan þann tíma. Þær héldu boltanum vel og náðu að spila honum vel á milli sín. 

Hverjar stóðu upp úr?

Hjá Þrótti var það Murphy Alexandra Agnew sem var frábær í dag, með mark og nánast með stoðsendingu í seinna markinu. Ólöf Sigríður Kristinsdóttir var góð, skoraði og var dugleg að keyra upp völlinn og var svakalegur kraftur í henni allan leikinn. 

Hvað gekk illa?

Þrátt fyrir að Afturelding hafi byrjað leikinn af krafti og voru að ógna fyrstu tuttugu mínúturnar virtust þær detta alveg niður og voru að verjast gott sem restina af leiknum. Um leið og þær fengu boltann til sín voru þær fljótar að koma honum frá sér. 

Hvað gerist næst?

Í næstu umferð gerir Afturelding sér ferð norður til Akureyrar og sækir Þór/KA heim, þriðjudaginn 9. ágúst kl 17:30.  Sama dag fær Þróttur Selfoss í heimsókn og er leikurinn kl 20:00.

Alexander Aron Davorsson: „Mér fannst við geta betur, ég verð að vera alveg hreinskilin með það.“

Alexander Aron, þjálfari Aftureldingar

„Það er súrt að tapa þessum leik, mér fannst við ekkert endilega þurfa að tapa honum. Ég meina tvö mistök, tvö mörk og það er hundfúlt,“ sagði Alexander Aron Davorsson, þjálfari Aftureldingar, svekktur eftir leik. 

„Mér fannst mjög flott hvernig við komum til leiks. Síðan eftir tíu mínútur fer Ísafold meidd útaf hjá okkur, alltaf þegar einhver fer útaf snemma leiks riðlast liðið. Mér fannst við koma fínt út í dag, fyrstu 60 mínúturnar, þar til við fáum þetta mark á okkur. Mér fannst við geta betur, ég verð að vera alveg hreinskilin með það.“

Alexander sagði að hann hefði viljað sjá stelpurnar vera hugrakkari í þessum leik.

„Ég hefði viljað að við hefðum verið hugrakkari, að keyra meira á þetta og setja pressu betur og halda betur í boltann. Við fengum útlendinga fyrir þremur dögum, ákváðum það fyrir þremur dögum af því við vorum níu á æfingu, að styrkja liðið með nokkrum erlendum leikmönnum til þess að klára mótið. Það tekur tíma að púsla þessu saman og ég held að við séum það seigar að við munum ná því í lokin að vera með hörkulið í næsta leik.“

Næsti leikur er á móti Þór/KA og vill Alexander að þær haldi kassanum fram og hafi trú á því sem liðið er að gera. 

„Ég vill að þær haldi kassanum fram og fari í hvert verkefni fyrir sig. Ég meina tveir sigur leikir í röð, þá erum við komnar úr fallsæti, það er svo stutt í þessu. Við þurfum að halda áfram að trúa því sem við erum að gera og við verðum allavega ekki verri í fótbolta, við verðum betri í fótbolta að spila í þessari deild og það er það sem við getum tekið út úr þessu.“


Tengdar fréttir

„Þetta voru bestu 90 mínútur sem við höfum átt í sumar“

„Ég er mjög ánægður. Við vorum betra liðið í leiknum. Við gerðum réttu hlutina, héldum boltanum á hreyfingu, fundum góðar lausnir og náðum loksins að brjóta þær niður,“ sagði Nik Chamberlain, þjálfari Þróttar R., eftir 2-0 sigur á Aftureldingu í kvöld.

Bein lýsing

Leikirnir




    Velkomin á Vísi. Þessi vefur notar vafrakökur. Sjá nánar.