HK á toppinn og Fylkir upp í annað sæti

Fátt var um færi í fyrri hálfleik þegar HK tók á móti Kórdrengjum, en Stefán Ingi Sigurðarson braut ísinn fyrir heimamenn strax í fyrstu sókn síðari hálfleiks.

Ásgeir Marteinsson tvöfaldaði svo forysti HK-inga á 56. mínútu, en Þórir Rafn Þórisson minnkaði muninn fyrir Kórdrengi tveimur mínútum síðar.

Stefán Ingi Sigurðarson bætti svo öðru marki sínu við og þriðja marki HK-inga á 76. mínútu og þar við sat. Eiður Atli Rúnarsson fékk að líta sitt annað gula spjald í liði HK á 87. mínútu og þar með rautt, en það kom ekki að sök og niðurstaðan 3-1 sigur heimamanna.

Sigurinn lyftir HK-ingum á topp Lengjudeildarinnar þar sem liðið er nú með 15 stig eftir sjö leiki. Kórdrengir sitja hins vegar í sjöunda sæti með tíu stig.

Á sama tíma sóttu Fylkismenn Gróttu heim þar sem Árbæingar unnu öruggan 2-5 sigur.

Nikulás Val Gunnarsson kom gestunum yfir með marki af vítapunktinum snemma leiks áður en Mathias Laursen tvöfaldaði forskotið fyrir háfleikshléið.

Kjartan Kári Halldórsson minnkaði muninn fyrir Gróttu með marki af vítapunktinum á 48. mínútu, en Benedikt Daríus Garðarsson endurheimti tveggja marka forskot Fylkis mínútu síðar.

Markaskorarinn Kjartan Kári Halldórsson fékk svo að líta beint rautt spjald í liði Gróttu á 55. mínútu og í kjölfarið bættu Þórður Gunnar Hafþórsson og Hallur Húni Þorsteinsson sitt hvoru markinu við fyrir Fylki.

Luke Rae skoraði eitt sárabótarmark fyrir heimamenn stuttu fyrir leikslok og þar við sat. Niðurstaðan 2-5 sigur Fylkis sem nú situr í öðru sæti deildarinnar með 14 stig eftir átta leiki. Grótta situr tveimur sætum neðar með einu stigi minna, en hafa leikið einum leik minna en Fylkismenn.

Upplýsingar um markaskorara og atvik fengust á Fótbolti.net.