Komu að tjald­svæðinu lokuðu og enduðu sem tjald­verðir

Þeir Hinrik Orri og Kristófer Emil halda úti Instagramreikningunum Tjaldlíf þar sem þeir leyfa fylgjendum að fylgjast með daglegu lífi þeirra á Eskifirði. Þar hafa þeir komið sér fyrir þar sem þeir réðu sig til vinnu í álveri Alcoa á Reyðarfirði. 

„Þetta byrjaði svolítið skemmtilega hjá okkur. Við ætluðum upprunalega að fara á Eskifjörð eða Reyðarfjörð og búa þar á meðan við myndum vinna fyrir Alcoa, álverið hérna. Svo fékk ég þá brilliant hugmynd mánuði áður en við lögðum af stað að gista bara í tjaldi,“ segir Kristófer í samtali við Vísi.

 „Við fundum alveg einhverja gistingu en svo vorum við bara sáttir við að láta vaða á tjaldið. Þetta er svona smá test líka hvað við náum að endast lengi. Og það er búið að koma okkur báðum á óvart hvað við erum búnir að ná að endast. Þetta er bara mjög skemmtilegt,“ segir Hinrik.

Þeir komu á Austfirði í byrjun sumars og hófu leit að hinu fullkomna tjaldsvæði þar sem þeir myndu verja sumrinu. Það fundu þeir á Eskifirði, tjaldsvæðið í Bleiksárhlíð. Þá ákváðu þeir að stofan Instagramsíðu sem þeir nefndu Tjaldlíf í höfuðið á kvikmyndunum frægu.

Komu að kofanum tómum eftir vinnu

Það var svo á fimmudaginn þegar þeir Hinrik og Kristófer komu heim á tjaldsvæði eftir vinnu í álverinu og hittu þar ekki nokkurn mann. Búið var að læsa þjónustuhúsinu og báðum salernum svæðisins. 

„Þetta var smá svekk en svo náttúrulega hringdum við bara nokkur símtöl og fórum að forvitnast hvern við gætum talað við. Hvort það væri hægt að opna tjaldsvæðið eða af hverju það væri verið að loka því,“ segir Hinrik Orri.

Þá komust þeir í samband við staðarhaldara sem tjáði þeim að búið væri að loka tjaldvæðinu einfaldlega vegna þess að tjaldverði skorti. Þá buðust þeir til að taka við stjórn svæðisins sem staðarhaldari var hæstánægður með.'

„Þannig að nú erum við tjaldsvæðaverðir á Eskifirði. Þetta var rosalega einfalt ferli. Þetta var svona win-win dæmi, hana vantaði staff og okkur vantaði gott heimili. Það eru allir alsáttir,“ segja þeir.

Ganga í öll verkefni

Þeir Hinrik og Kristófer fá auðvitað frítt pláss fyrir tjaldið sitt en þeir fá einnig greitt fyrir starfið, hluta af tekjum ef það verður nóg að gera, annars hefðbundin laun. Þá fá þeir aukaverkefni frá staðarhaldara, til að mynda að slá gras og laga það sem laga þarf á svæðinu. Til að mynda réðust þeir í að þrífa allt hátt og lágt á svæðinu í gær.

Vilja fá sem flesta austur

Hluti af ástæðunni fyrir því að þeir félagar héldu austur í sumar var að þeir áttu báðir eftir að skoða landshlutann. „Við ætlum að sjá til þess að hann verði tekinn í bak og fyrir áður en við förum. Ætlum að þekkja alla hóla og hæðir hérna,“ segir Kristófer.

Þeir segja veðurblíðu hafa einkennt fyrstu daga ferðalagsins og hvetja þeir sem flesta til að koma austur í blíðuna. Þá vilja þeir skiljanlega fá sem flesta á tjaldsvæðið þeirra.

„Við viljum fá alla. Við viljum fá fólk af því að hérna verður stuðið í sumar og hvergi annars staðar. Svo verður gott og hreint klósett, við munum sjá um það. Þetta verður hreinasta tjaldsvæði sem þú hefur séð í áratugi,“ segja þeir.