Fótbolti

Styttan af Zi­da­ne að skalla Materazzi til sýnis á nýjan leik

Runólfur Trausti Þórhallsson skrifar
Styttan fræga.
Styttan fræga. KARIM JAAFAR/AL-WATAN DOHA/Getty Images

Eitt frægasta atvik knattspyrnusögunnar var gert ódauðlegt er það var gert að tæplega fimm metra hárri bronsstyttu sem ber nafnið „Coup de tete.“ Styttan verður til sýnis á HM karla í knattspyrnu sem fram fer í Katar undir lok þessa árs.

Um er að ræða styttu af því þegar Zinedine Zidane skallaði Marco Materazzi í bringuna í úrslitaleik Frakklands og Ítalíu á HM 2006. 

Zidane var rekinn af velli og Ítalía vann í vítaspyrnukeppni en það sem gerði atvikið ódauðlegt var að Zidane lagði skóna á hilluna eftir mótið. Hann lék hvorki með félagsliði né landsliði á nýjan leik.

Atvikið er það gerðist.Skjáskot

Coup de tete-styttan verður hluti af nýju íþróttasafni í Katar en segja má að hún hafi verið í felum í hartnær níu ár. Aðeins nokkrum dögum eftir að hún var frumsýnd árið 2013 var hún fjarlægð þar sem hún þótti fegra ofbeldi.

„Þróun á sér stað í samfélögum. Það tekur allt tíma og það sem fólk gagnrýnir í upphafi getur það skilið og tekið í sátt síðar meir,“ sagði Sheikha al-Mayassa al-Thani, systir emírsins í Ktar og stjórnarkona safna landsins.

„Zidane er mikill vinur Katar og frábær fyrirmynd fyrir Araba. Markmið okkar er að styrkja fólk,“ bætti hún við að lokum.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.