Enski boltinn

Chelsea vinnur Lundúnaslaginn með 10 leikmenn | Dagný spilaði 90 mínútur í sigri West Ham

Atli Arason skrifar
Dagný Brynjarsdottir spilar fyrir West Ham United.
Dagný Brynjarsdottir spilar fyrir West Ham United. Getty Images

Dagný Brynjarsdóttir, leikmaður West Ham, spilaði allan leikinn í 1-2 útisigri liðsins á Reading í ensku ofurdeildinni í fótbolta í dag. Chelsea vann Tottenham á útivelli í Lundúnaslag á sama tíma, lokatölur 1-3.

Tottenham komst yfir með sjálfsmarki Sophie Ingle strax á 15. mínútu en Guro Reiten jafnaði fyrir Chelsea rúmum 10 mínútum síðar. Á 33. mínútu leiksins fær Ann-Katrin Berger, markvörður Chelsea, beint rautt spjald og Chelsea spilaði einum leikmanni færri það sem eftir lifði leiks.

Það kom þó ekki á sök því Samantha Kerr kom 10 leikmönnum Chelsea í forystu á 71. mínútu leiksins áður en Jessie Fleming klárar leikinn á fimmtu mínútu uppbótatíma síðari hálfleiks. Lokatölur 1-3 í leik þar sem leikmenn Chelsea skoruðu öll fjögur mörkin.

Með sigrinum er Chelsea komið með fjögurra stiga forskot á toppi deildarinnar þegar liðið á þrjá leiki eftir af deildinni. Arsenal er í öðru sæti með 43 stig en á þó einn leik til góða á Chelsea. Tottenham er í 5. sæti með 28 stig.

Dagný Brynjarsdóttir spilaði allan leikinn á miðjunni hjá West Ham í 1-2 útisigri liðsins á Reading fyrr í dag. Emma Snerle og Yui Hasegawa koma West Ham í tveggja marka forystu með mörkum sínum í síðari hálfleik áður en Faye Bryson minnkar muninn á 95. mínútu leiksins.

West Ham er með sigrinum komið upp í 6. sæti deildarinnar með 27 stig en Reading er í 8. sætinu með 24 stig. Bæði lið eiga tvo leiki eftir í deildinni.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.