Bál tímans og Bannað að eyði­leggja til­nefndar til barna- og ung­linga­bók­mennta­verð­launa Norður­landa­ráðs

Það eru rithöfundurinn Arndís Þórarinsdóttir og myndhöfundurinn Sigmundur B. Þorgeirsson sem eru á bak við bókina Bál tímans: Örlagasaga Möðruvallabókar í sjö hundruð ár. Í bókinni er farið í æsispennandi tímaflakk í fylgd gamallar skinnbókar.

„Hvernig skrifar maður um eldgamalt skinnhandrit og mörg hundruð ára gamlan þjóðararf þannig að nútímabörn langi til að lesa? Arndísi Þórarinsdóttur hefur tekist það listilega vel með því að setja sig í spor Möðruvallabókar og skrifa þvæling hennar í gegnum Íslandssöguna sem háskalega spennusögu,“ er meðal þess sem segir í rökstuðningi tilnefningarinnar. 

Bókin Alexander Daníel Hermann Dawidsson: Bannað að eyðileggja var einnig tilnefnd til verðlaunanna. Það var rithöfundurinn Gunnar Helgason sem skrifaði bókina og Rán Flygenring myndskreytti. Bókin fjallar um litríkt líf Alexanders Daníels Hermanns sem er með ADHD.

„Alexander upplifir heiminn á alveg einstakan hátt sem hefur bæði neikvæð og jákvæð áhrif á alla hans tilvist. En eitt er alveg skýrt frá upphafi: Við erum með Alexander í liði og í því liggur styrkur bókarinnar. Samkenndin með honum er rík og það er sárt þegar Alexander og heimurinn rekast saman. Sterkur þráður í bókinni er sú mikilvæga hugsun að mæta öllum, stórum og smáum, þar sem þau standa,“ segir í rökstuðningi.

Barna- og unglingabókmenntaverðlaun Norðurlandaráðs voru veitt í fyrsta sinn árið 2013 að ósk norrænu menningarmálaráðherranna, sem höfðu um árabil viljað efla og vekja athygli á barna- og unglingabókmenntum á Norðurlöndum.

Verðlaunin eru veitt fyrir fagurbókmenntaverk fyrir börn og unglinga sem samið er á einu af norrænu tungumálunum. Verkið getur sameinað texta og myndir og skal uppfylla strangar kröfur um bókmenntalegt og listrænt gildi.

Hér má sjá allar þrettán tilnefningarnar.