„Það er svolítið síðan við ætluðum að halda þá. Þá vorum við 25 ára, nú erum við 27,“ sagði Daníel Ágúst Haraldsson, söngvari sveitarinnar, þegar rætt var við hann í beinni útsendingu í Kvöldfréttum Stöðvar 2, þar sem hann var mættur í smink.
Hljómsveitin var stofnuð árið 1995 og fagnaði því 25 ára afmæli á því herrans ári 2020, þegar Covid-19 olli því að lítið var um stórtónleika, hvort sem er hér á landi eða annars staðar.
Daníel Ágúst segir að fresta hafi þurft tónleikunum þrisvar eða fjórum sinnum, og kveðst spenntur fyrir kvöldinu.
„Það er náttúrulega frábært að fá að vinna vinnuna sína og forréttindi að fá að vinna við það sem maður hefur áhuga á og elskar.“
Fjöldi fólks mun koma fram með sveitinni í kvöld og Daníel Ágúst lofar skemmtun.
„Þetta verður stórveisla.“
Fernir tónleikar eru fyrirhugaðir um helgina vegna afmælis sveitarinnar. Tvennir í kvöld og tvennir á morgun. Uppselt er á alla.
