Gífurleg orka náttúrunnar færð yfir á strigann

Súrrealískir karakterar

Verk Guðrúnar Einarsdóttur líkjast óneitanlega landslagsmálverki við fyrstu sýn. Þegar nær er komið sýna þau hins vegar súrrealískan karakter með óhefðbundnum myndunum og dýpt lita. Innan marka strigans birtist hin gífurlega orka náttúrunnar á einstakan hátt, þar sem efniviður málverksins, olían og bindi- og leysiefnin eru vakin upp. 

Innra líf þeirra og efnasambönd eru stýrð af listamanninum. Guðrún skapar þannig umgjörð fyrir lífrænt ferli sem svipar til náttúrunnar og fær áhorfandann til að nema staðar við strigann og virða fyrir sér efnislandslagið.

Efnafræðin tengd listinni

Guðrún hefur tekið þátt í fjölda samsýninga á undanförnum tveimur áratugum ásamt því að hafa sýnt einkasýningar bæði hér heima og erlendis. Hún stundaði nám í málaradeild og fjöltæknideild Myndlistar- og Handíðaskóla Íslands á níunda áratugnum en ásamt því hefur hún tekið námskeið í efnafræði síðar á ferlinum. 

Það verður að segjast að efnafræðin og myndlistin myndi virkilega áhugaverða blöndu sem kemur fram á svo einstakan hátt í listsköpun Guðrúnar. Sýningin stendur til 11. apríl næstkomandi.