Sport

Engir miðar seldir í Peking

Sindri Sverrisson skrifar
Það er allt að verða klárt í Peking fyrir Vetrarólympíuleikana sem standa yfir frá 4.-20. febrúar.
Það er allt að verða klárt í Peking fyrir Vetrarólympíuleikana sem standa yfir frá 4.-20. febrúar. EPA-EFE/WU HONG

Ekki verða seldir miðar til almennra áhorfenda, hvorki heimamanna né útlendinga, á Vetrarólympíuleikana sem hefjast í Peking í næsta mánuði.

Ástæðan er útbreiðsla kórónuveirufaraldursins. Mótshaldarar höfðu áður gefið út að erlendir áhorfendur yrðu ekki leyfðir en nú er ljóst að engir áhorfendur fá að kaupa miða.

Aftur á móti verður ákveðnum, sérvöldum hópum fólks boðið að mæta á leikana og munu þeir áhorfendur þurfa að fara eftir ströngum sóttvarnareglum fyrir, á meðan og eftir að þeir mæta á leikana.

Sömu reglur gilda varðandi ólympíumót fatlaðra sem fram fer í mars á sama stað.

Skipulagsnefnd viðburðanna vildi ekki útskýra nánar hvernig þeir áhorfendur sem fá boð á þessi stærstu vetraríþróttamót heims yrðu valdir.

Keppendur, þjálfarar og aðrir sem starfa við Verarólympíuleikana þurfa að sjálfsögðu einnig að hlíta ströngum sóttvarnareglum og verða í búbblu alla leikana, fjarri almenningi í Kína.

Í síðasta mánuði tilkynnti ameríska NHL íshokkídeildin það að leikmenn deildarinnar yrðu ekki með í Peking vegna þeirra áhrifa sem kórónuveirufaraldurinn hefur haft á leikjadagskrána í deildinni.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.