Sonur Zlatan Ibrahimovic vill nú skipta um eftirnafn

Strákarnir hans Ibrahimovic skráðu sig hjá Hammarby undir eftirnafni móður sinnar til að forðast pressuna og athyglina sem kæmi um leið og menn sjá Ibrahimovic nafnið.

Zlatan sagði blaðamanni Dagens Nyheder frá því að eldri strákurinn hans vilji nú vera Ibrahimovic.

„Hann hefur valið það að vera Ibrahimovic,“ sagði Zlatan Ibrahimovic við DN.

Ibrahimovic hefur átt hlut í Hammarby IF síðan árið 2019. Hann býr og vinnur sem leikmaður AC Milan í Mílanóborg en restin af fjölskyldunni býr í Stokkhólmi.

Strákarnir hans eru þrettán og fimmtán ára gamlir og hafa spilað undir nafni móður sinnar, Helena Seger, en þeir heita Maximilian (fæddur 22. september 2006) og Vincent (fæddur 6. mars 2008).

„Við ákváðum að gera þetta svo að það væri ekki of mikil pressa á þeim. En það breytir kannski ekki öllu því fólk bendir, talar og hvíslar. Þeir hafa ráðið vel við þetta og eru mjög sterkir,“ sagði Zlatan.

Nú er sá eldri harður á því að vera með Ibrahimovic á bakinu.

„Hann hefur ákveðið að breyta nafninu og vera Ibrahimovic. Sá yngri er enn svo ungur. Þetta skiptir mig ekki miklu máli því það mikilvægasta er að þeir séu heilbrigðir og líði vel,“ sagði Zlatan.

„Ég krefst einskis. Ég vil bara að þeir leggi sig fram og geri sitt besta. Líka að þeir geri þetta fyrir sig sjálfa en ekki fyrir pabba, mömmu eða einhvern annan. Ég hef séð fullt af foreldrum pressa á börnin sín eins og það sé skylda fyrir þau að verða atvinnumenn. Þannig á þetta ekki að vera,“ sagði Zlatan.