Fótbolti

Vill ekki fara til Man. Utd. eða Bayern vegna veðursins

Ingvi Þór Sæmundsson skrifar
Frenkie De Jong kann vel við sig í sólinni í Barcelona.
Frenkie De Jong kann vel við sig í sólinni í Barcelona. getty/Quality Sport Images

Faðir Frenkies de Jong, hollenska landsliðsmannsins hjá Barcelona, segir að hann muni ekki fara til Manchester United eða Bayern München vegna veðursins í Manchester og München.

Barcelona keypti De Jong frá Ajax fyrir 65 milljónir punda fyrir tveimur árum. Hann hefur ekki náð sama flugi hjá Barcelona og hjá Ajax og ekki er ljóst hvort hann verður áfram í herbúðum Börsunga, sérstaklega þar sem þeir eru blankir. Talið er að skuldir Barcelona nemi rúmum einum milljarði punda.

Faðir De Jongs, John, segir að mörg af stærstu félögum Evrópu hafi áhuga á syni hans. United og Bayern koma þó ekki til greina.

„Það er oft slæmt veður þar. Auðvitað snýst þetta um fótbolta en þetta skiptir máli,“ sagði pabbinn.

„Ég veit að Barcelona vantar pening og frábært tilboð í Frenkie gæti hjálpað en ég sé það ekki gerast í nánustu framtíð þrátt fyrir að vera fimm stórlið hafi öll haft samband.“

Pabbinn segir að sonurinn og kærasta hans, Mikky, kunni afar vel við sig í sólinni í Barcelona. „Þau njóta sín svo vel í Barcelona. Lífið er frábært þar. Ég fer oft þangað. Jafnvel núna er sól og sextán stiga hiti.“

Barcelona er í 8. sæti spænsku úrvalsdeildarinnar, átján stigum á eftir toppliði Real Madrid. Xavi tók við Barcelona í síðasta mánuði en liðið hefur aðeins unnið tvo af sex leikjum undir hans stjórn.




Fleiri fréttir

Sjá meira


×