Erlent

Stærstu lyfjaverslanakeðjurnar dæmdar sekar fyrir sinn þátt í opíóíðafaraldrinum

Hólmfríður Gísladóttir skrifar
Forsvarsmenn CVS hyggjast áfrýja en aðrir hafa ekki svarað fyrirspurnum BBC.
Forsvarsmenn CVS hyggjast áfrýja en aðrir hafa ekki svarað fyrirspurnum BBC.

Stærstu lyfjaverslanakeðjur Bandaríkjanna hafa verið fundnar sekar um að hafa orðið til þess að auka magn ópíóíða í umferð. Bætur í málinu verða ákvarðaðar síðar en ein af keðjunum hefur þegar gefið út að dómnum verði áfrýjað.

Umræddar keðjur eru Walgreens, CVS og lyfjaverslanir Walmart. 

Dómurinn féll í Ohio, þar sem verslanirnar voru sakaðar um að hafa lagt sitt á vogarskálarnar til að kynda undir ofneyslu ávanabindandi verkjalyfja í tveimur sýslum.

Milljónir Bandaríkjamanna eru sagðir hafa ánetjast sterkum ópíóíðum á síðasta áratug en um er að ræða verkjalyf á borð við Fentanyl og OxyContin. Ofnotkunin hefur verið rakin til frjálslegra ávísana á lyfin og misnotkun þeirra.

Ofneysla lyfjanna er sögð hafa valdið nærri 500 þúsund dauðsföllum í Bandaríkjunum á árunum 1999 til 2019.

3.300 mál fyrir dómstólum

Yfirvöld segja faraldurinn hafa sett gríðarlegt álag á heilbrigðiskerfið, þar sem þess hefur verið freistað að mæta vandanum í gegnum bæði félagslega kerfið og dómskerfið. Áætlað er að um 3.300 mál hafi verið höfðuð fyrir dómstólum til að freista þess að sækja þessi útgjöld aftur til framleiðenda lyfjanna, lækna og lyfjaverslana.

Lögmenn sýslanna tveggja í Ohio, Lake og Trumbull, segja kostnað þeirra vegna ópíóíðafaraldursins mögulega um milljarð dala í hvorri sýslu fyrir sig. Dómurinn yfir lyfjaverslanakeðjunum sé löngu tímabær en málið gegn þeim byggði meðal annars á því að verslanirnar hefðu ekki hirt nógu vel um að ávisanirnar sem þær leystu út væru réttmætar.

Talsmenn CVS hafa greint frá því að fyrirtækið hyggjast áfrýja dómnum en ekki náðist í forsvarsmenn hinna keðjanna.

BBC greindi frá.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.