Ungverskar bullur réðust að lögreglu á Wembley

Bullurnar bauluðu jafnframt þegar ensku landsliðsmennirnir krupu á hné fyrir upphaf leiksins, líkt og leikmenn hafa gert síðustu misseri til að sýna samstöðu með réttindabaráttu svartra.

Lögregla sagði „minni háttar ólæti“ hafa brotist út eftir að einn var handtekinn fyrir kynþáttaníð sem beindist gegn vallarstarfsmanni. Málið hafi hins vegar verið afgreitt fljótt án frekari vandræða.

Fyrir mánuði síðan urðu leikmenn Englands fyrir kynþáttaníði þegar liðið mætti Ungverjalandi á útivelli í Búdapest.

Íslendingar kynntust ungverskum fótboltabullum á Evrópumótinu í Frakklandi 2016 þar sem ólæti þeirra ollu meðal annars miklum töfum við að hleypa áhorfendum inn á leikvanginn í Marseille þar sem Ísland og Ungverjaland mættust í 1-1 jafntefli.

Leiknum á Wembley í gærkvöld lauk með 1-1 jafntefli þar sem John Stones jafnaði metin fyrir England í fyrri hálfleik eftir að Roland Sallai kom gestunum yfir úr vítaspyrnu.

England er efst í I-riðli með 20 stig, þremur stigum á undan Póllandi, en Ungverjaland á ekki lengur von um að komast á HM.