Andrarnir í hópnum eru báðir tæpir

Eiður Smári Guðjohnsen, aðstoðarþjálfari, þjálfari íslenska karlalandsliðsins í knattspyrnu, ræddi stöðuna á þessum tveimur leikmönnum á fjarfundi með íslenskum blaðamönnum í dag.

Andri Fannar Baldursson hefur ekki verið í hópnum í síðustu leikjum hjá danska liðinu FC Kaupmannahöfn og kemur því meiddur til móts við landsliðið.

„Andri Fannar er að glíma við meiðsli í nára og hann er bara í skoðun hjá sjúkraþjálfurum liðsins. Það mun koma í ljós hversu mikið það er,“ sagði Eiður Smári en svo gæti farið að sonur hans verði ekkert með í þessu verkefni.

Andri Lucas var að spila með liði Real Madrid Castilla um helgina en varð fyrir hnjaski í leiknum. Áður hafði hann bæði skorað og lagt upp mark.

„Andri Lucas spilaði um helgina og fékk smá högg rétt fyrir ofan hné. Við munum setja það í hendurnar á læknateymi og sjúkraþjálfurum liðsins hvert framhaldið verður,“ sagði Eiður.

„Það verður að koma í ljós hvort hann verði leikfær. Þetta gæti tekið nokkra daga og hann gæti líka misst af báðum leikjunum. Það fer algjörlega eftir hvernig hann mun bregðast við meðhöndlun sjúkraþjálfara,“ sagði Eiður.

Aðrir leikmenn eru klárir fyrir utan að menn eru að glíma við einhver meiðsli sem fylgja því að leikmenn eru að jafna sig eftir síðasta leik með félagsliðum sínum.