Íslenski boltinn

Kristall Máni fyrstur síðan Höddi Magg náði þessu fyrir þrjátíu árum

Óskar Ófeigur Jónsson skrifar
Kristall Máni Ingason fagnar einu af þremur mörkum sínum á móti Vestra um helgina.
Kristall Máni Ingason fagnar einu af þremur mörkum sínum á móti Vestra um helgina. Vísir/Bára Dröfn

Kristall Máni Ingason tryggði Víkingum sæti í bikarúrslitaleiknum með því að skora öll mörk liðsins í 3-0 sigri á Vestra á KR-vellinum á laugardaginn.

Kristinn hélt því frábærlega upp á það að hafa verið kosinn efnilegasti leikmaður Pepsi Max deildarinnar í sumar.

Það er óhætt að segja að það gerist á hverjum degi að leikmenn nái að skora svo oft á þessu stigi bikarkeppninnar.

Hörður Magnússon á baksíðu Morgunblaðsins eftir leikinn 1991.Skjámynd/timarit.is/MBL

Kristall Máni varð nefnilega um leið fyrsti maðurinn til að skora þrennu í undanúrslitaleik bikarsins síðan að FH-ingurinn Hörður Magnússon náði því í Garðinum 8. ágúst 1991 eða fyrir meira en þremur áratugum síðan.

Hörður Magnússon skoraði tvö marka sinna í framlengingu en síðastur til að skora þrennu í venjulegum leiktíma í undanúrslitum bikarkeppninnar var Guðmundur Steinsson, tveimur árum á undan Herði.

Hörður náði því í bikarkeppninni 1991 að skora í hverri umferð og þar á meðal í bikarúrslitaleiknum. Hann endaði hins vegar með jafntefli og FH tapaði síðan 1-0 á móti Val í aukaleik nokkrum dögum síðar.

Frétt DV um leikinn daginn eftir.Skjámynd/timarit.is/DV

Þetta var níunda þrennan í undanúrslitum bikarkeppni karla og þær hafa skorað átta leikmenn. Hermann Gunnarsson er sá eini sem hefur skorað tvær þrennur í undanúrslitum en það gerði hann tvö ár í röð frá 1965 til 1966.

Hermann var ekki búinn að halda upp á nítján ára afmælið sitt þegar hann skoraði þrenunna 1965 en Kristall Máni er nítján ára gamall síðan í janúar.

  • Þrennur í undanúrslitaleikjum í bikarkeppni karla í knattspyrnu:
  • 2021 - Kristall Máni Ingason, Víkingi (í 3-0 sigri á Vestra)
  • 1991 - Hörður Magnússon, FH (í 3-1 sigri á Víði)
  • 1989 - Guðmundur Steinsson, Fram (í 4-3 sigri á Keflavík)
  • 1983 - Guðbjörn Tryggvason, ÍA (í 4-2 sigri á Breiðabliki í endurteknum leik)
  • 1980 - Sigurlás Þorleifsson, ÍBV (í 3-0 sigri á Breiðabliki)
  • 1967 - Helgi Númason, Fram (í 3-3 jafntefli á móti KR, aukaleikur spilaður)
  • 1966 - Hermann Gunnarsson, Val (í 5-0 sigri á Þrótti R.)
  • 1965 - Hermann Gunnarsson, Val (í 3-2 sigri á ÍBA)
  • 1963 - Ellert B. Schram, KR (í 3-2 sigri á Keflavík)



Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.