Innlent

Leiðtogar rifust um jöfnuð

Samúel Karl Ólason skrifar
Gunnar Smári Egilsson og Logi Einarsson voru meðal þeirra sem gagnrýndu ríkisstjórnina vegna skorts á aðgerum til að auka jöfnuð.
Gunnar Smári Egilsson og Logi Einarsson voru meðal þeirra sem gagnrýndu ríkisstjórnina vegna skorts á aðgerum til að auka jöfnuð. Vísir/Vilhelm

Leiðtogum stjórnmálaflokkanna varð mörgum heitt í hamsi þegar jöfnuður var til umræðu á Kappræðum fréttastofu Stöðvar 2, Bylgjunnar og Vísis í kvöld.

Umræðan byrjaði á því að Heimir Már spurði Loga Einarsson, formann Samfylkingarinnar, hvar ríkisstjórnin hefði ekki staðið sig nægilega vel.

Logi sagði ríkisstjórnina hafa klúðrað því að ná jöfnuði í landinu og sýnt metnaðarleysi á mörgum sviðum eins og loftslagsmálum. Fyrst og fremst hefði hún ekki sýnt þeim sem standa höllum fæti nægan áhuga.

Brýnt að fá nýja ríkisstjórn

„Þess vegna er mjög brýnt að það taki við ný ríkisstjórn sem að jafnar kjörin í landinu. Sem að færir fé frá þeim allra ríkustu, eitt prósent þjóðarinnar, og yfir á stærsta hluta hennar. Það verður hreinlega að mynda þannig ríkisstjórn,“ sagði Logi.

Katrín Jakobsdóttir, forsætisráðherra og formaður Vinstri grænna, sagði nauðsynlegt að hafa staðreyndir á hreinu. Hún sagði lífskjarasamninga hafa verið gerða á kjörtímabilinu og að verkalýðshreyfingin hefði lagt áherslu á hækkun lægstu launa, sem væri jákvætt.

Katrín Jakobsdóttir, forsætisráðherra, og Bjarni Benediktsson, fjármálaráðherra, sögðu jöfnuð hafa aukist og skattbyrði þeirra tekjulægstu hafa minnkað síðustu ár.Vísir/Vilhelm

„Sú áhersla skilar sér inn í það að það er tiltölulega mikill tekjujöfnuður á Íslandi. En hvað gerði ríkisstjórnin, jú, hún hækkaði barnabætur. Hún lækkaði skatta á tekju lægsta fólkið,“ sagði Katrín.

Hún sagði skattbyrði á þessa hópa vera að lækka. Einnig hefði verið gripið til aðgerða í húsnæðismálum.

Kerfið borið uppi af þeim tekjuhæstu

Í kjölfar þess vildi Bjarni Benediktsson, fjármálaráðherra og formaður Sjálfstæðisflokksins, ræða skattkerfið og það að það hefði ekki verið notað til að jafna kjör á Íslandi. Meðal annars sagði Bjarni að skattar hefðu verið mest lækkaðir á þá sem væru með um 350 þúsund krónur í laun á mánuði.

„Við skulum aðeins hafa eina staðreynd á hreinu hérna, því hér er talað um að þeir sem eru tekjuhæstir komist langbest frá þessu,“ sagði Bjarni.

„Tuttugu prósent tekjuhæsta fólksins, skilar til ríkisins 75 prósentum af tekjunum þegar tekið er tillit til bótakerfanna. 75 prósent af tekjunum koma frá tuttugu prósent tekjuhæsta fólkinu,“ sagði Bjarni.

„Kerfið er borið uppi af þeim sem eru með hæstu tekjurnar.“

Skortur á réttlæti

Gunnar Smári Egilsson, formaður framkvæmdastjornar Sósíalistaflokksins, sagði ríkisstjórnina ekki hafa stýrt samfélaginu út frá því að leita að jöfnuði og auknu réttlæti í Samfélaginu. Vísaði hann til ummæla fólks í innslagi sem hafði verið sýnt skömmu áður þar sem kjósendur töluðu um aukið réttlæti.

Gunnar Smári sagði ríkisstjórnina skilja eftir grunnstoðir samfélagsins eins og heilbrigðiskerfið veikar.

„Bjarni segir að það muni ekkert um skattlagningu á hina ríku. Til hvers var Sjálfstæðisflokkurinn þá að létta skattbyrðina af þeim. Fyrir þrjátíu árum, þá bar fólkið með lægstu tekjurnar, öryrkjarnir, engan skatt. Borgaði engan skatt.“

Gunnar sagði það hafa breyst á undanförnum þrjátíu árum þar sem Sjálfstæðisflokkurinn hefði verið lengi við völd.

Bjarni greip þá inn í og sagði það ranga spurningu. Ekki væri rétt að spyrja um skattprósentu heldur hvað fólk hefði milli handanna miðað við það sem áður var. Hverjar ráðstöfunartekjur þeirra væru.

„Þú ert bara með ranga nálgun, að vera að velta fyrir þér skattprósentunni. Það hjálpar fólki ekki að ná endum saman í lok mánaðar,“ sagði Bjarni. Hann sagði kaupmátt bóta aldrei hafa verið hærri.

„Má ég tala hérna?“ sagði Gunnar Smári þá og bætti við: „Þið fluttuð skattbyrðina af þeim sem hafa það betur, til þeirra sem hafa það verr. Það er siðlaus aðgerð af fjármálaráðherra að taka fjörutíu eða fimmtíu þúsund krónur af þeim sem ekki eiga fyrir mat út mánuðinn. Það er siðlaus aðgerð.“

Bjarni sagði aftur að kaupmátt ellilífeyris aldrei hafa verið hærri en í dag og það væri það sem skipti máli.

„Þetta er ykkar pólitík,“ Sagði Bjarni. „Þið hafnið staðreyndum.“

Hægt er að horfa á kappræðurnar í heild sinni hér.


Tengdar fréttir

Sérstaklega löng kosninganótt fram undan

Landsmenn þurfa líklega að bíða langt fram á morgun eftir endanlegum niðurstöðum kosninganna um helgina. Slæm veðurspá og sögulegur fjöldi utankjörfundaratkvæða setja strik í reikninginn. Landhelgisgæslan er í viðbragðsstöðu.

„Þó að við séum úti á landi þá erum við samt til“

Fólkið á Suðurlandi vill að framkvæmd brúar yfir Ölfusá verði flýtt, Austfirðingar vilja betri samgöngur og á Vestfjörðum minnir fólk á að heilbrigðismálin séu sett í forgang. Þetta kom fram í innslagi sem sýnt var í Pallborðsþætti Stöðvar 2 í kvöld.

Heilmikil dramatík í aðdraganda síðustu kosninga

Gengið verður til Alþingiskosninga laugardaginn 25. september. Í framhaldinu munu flokkarnir þreifa hver á öðrum varðandi myndun ríkisstjórnar. Það er sannarlega ekki alltaf auðvelt og var það sannarlega ekki fyrir fjórum árum.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.