Enski boltinn

Jóhann Berg: Vitum að Arsenal gæti þótt erfitt að mæta hingað

Sindri Sverrisson skrifar
Jóhann Berg Guðmundsson lagði upp mark gegn Everton en það dugði skammt því Everton skoraði svo þrjú mörk á sex mínútum, um miðjan seinni hálfleik.
Jóhann Berg Guðmundsson lagði upp mark gegn Everton en það dugði skammt því Everton skoraði svo þrjú mörk á sex mínútum, um miðjan seinni hálfleik. Getty/Clive Brunskill

Jóhann Berg Guðmundsson segir að hann og félagar hans hjá Burnley séu alveg spakir þrátt fyrir rýra uppskeru það sem af er leiktíð í ensku úrvalsdeildinni í fótbolta. Þeir ætli sér að hrella Arsenal á morgun líkt og á síðustu leiktíð.

Burnley hirti fjögur stig í leikjunum við Arsenal á síðustu leiktíð þegar liðið vann sinn fyrsta deildarsigur gegn Arsenal, 1-0 í Lundúnum.

Arsenal vann sinn fyrsta leik á tímabilinu í síðustu umferð, 1-0 gegn Norwich, eftir þrjú töp.

„Þeir hafa átt strembna byrjun en unnu góðan sigur gegn Norwich í síðasta leik, svo þeir verða með meira sjálfstraust,“ sagði Jóhann.

„En við vitum að þeim gæti þótt erfitt að mæta á Turf Moor og við ætlum að sjá til þess að það verði erfitt. Arsenal er auðvitað alltaf gott lið og spilar alltaf góðan fótbolta, með nokkra stórkostlega leikmenn, en við gerum þetta eins óþægilegt fyrir þá og hægt er,“ sagði Jóhann.

Eins og fyrr segir hefur tímabilið ekki byrjað vel hjá Burnley en eina stig liðsins koma á heimavelli gegn Leeds. Jóhann lagði upp mark gegn Everton á mánudaginn en Everton tryggði sér svo 3-1 sigur með þremur mörkum á sex mínútum.

„Á síðustu leiktíð þurftum við líka að bíða svolítið eftir sigri svo við erum ekkert að fara á taugum strax. Þetta snýst bara um að halda einbeitingu allar 90 mínúturnar,“ sagði Jóhann.

„Þetta hefur verið svolítið blönduð byrjun. Við höfum sýnt góða frammistöðu inn á milli en ekki náð úrslitum. Á mánudaginn þá vorum við bara ekki nógu góðir í þessar sex mínútur. Við höfum ekki náð að landa þremur stigum en það er margt jákvætt í gangi og bara nokkur atriði sem við þurfum að laga. Vonandi gerist það [á morgun]. Ég er sannfærður um það,“ sagði Jóhann.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.