Erlent

Aldrei hafa fleiri almennir borgarar látist í Afganistan

Árni Sæberg skrifar
Talíbanar hófu stórsókn þegar erlendir herir yfirgáfu Afganistan.
Talíbanar hófu stórsókn þegar erlendir herir yfirgáfu Afganistan. MYND/AP

Almennir borgarar í Afganistan sem deyja í átökum hafa sjaldan eða aldrei verið fleiri en nú um stundir, síðan Sameinuðu þjóðirnar hófu að safna slíkum tölum í landinu.

Þetta kemur fram í nýrri skýrslu þar sem segir að hörð átök í dreifðari byggðum landsins frá upphafi maímánaðar hafi bitnað illilega á venjulegum Afgönum, en Talíbanar hafa verið að færa sig verulega upp á skaftið í landinu og stjórna nú stórum landsvæðum. 

Í skýrslu Sameinuðu þjóðanna er bent á að mannfallið nú eigi sér fyrst og fremst stað á strjálbýlli svæðum og að það gæti því aukist enn meira ef átökin færast til stærri borga og bæja. 

Frá fyrsta maí hafa 783 almennir borgarar látið lífið og um 1600 særst, og er það svipuð tala og var fyrstu fjóra mánuði ársins. Þetta eru hæstu tölur síðan Sameinuðu þjóðirnar hófu að taka slíkt saman fyrir hvern mánuð árið 2009 og líklega þær hæstu síðan Talíbönum var komið frá völdum árið 2001, að því er skýrsluhöfundar segja.

„Ég grátbið Talíbana og leiðtoga Afganistan að taka mark á dapurlegum og ógnvænlegum ferli átakanna og hrikalegra áhrifa þeirra á almenna borgara,“ segir Deborah Lions, fulltrúi aðalritara Sameinuðu þjóðanna í Afganistan, um ástandið í landinu.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.