Eftir að hafa legið kófsveittur undir feldi hefur Brynjar ákveðið að hætta við að hætta

Brynjar sendi frá sér tilkynningu þessa efnis á Facebook-síðu sinni nú rétt í þessu. Þar segir hann að eftir prófkjör Sjálfstæðisflokksins í Reykjavík hafi hann talið rétt að kveðja stjórnmálin. Niðurstaðan hafi verið vonbrigði og talsvert frá hans markmiðum.

„Þessi ákvörðun féll í grýttan jarðveg hjá mörgum flokksmönnum og var lagt nokkuð hart að mér að endurskoða þessa ákvörðun. Ég féllst á að íhuga það. Mér var bent á af sérfræðingum í eðli prófkjara og Kremlarlógíu flokksins að niðurstaða prófkjörsins hafi verið góð fyrir mig. 

Að lokum náðist að sannfæra mig að ég hafi í raun verið sigurvegari prófkjörsins og þetta hafi að auki verið stórsigur.“

Kófsveittur og illa lyktandi

Brynjar bætir þá í þegar hann talar um þessi miklu innri og ytri átök:

„Eftir að hafa legið undir feldi á þriðju viku, kófsveittur og illa lyktandi hef ég ákveðið að þiggja sæti á listanum, ef það stendur þá enn til boða. Ég er sannfærður um að stefna flokksins sé góð fyrir land og þjóð. Ég tel að ég geti orðið að liði í komandi kosningabaráttu og er sannfærður að sterkur og breiður Sjálfstæðisflokkur er mikilvægur svo að okkur vegni vel, meira nú en oft áður.“

Brynjar klykkir út með því að segja að í Sjálfstæðisflokknum séu margar vistarverur og öll séum við ólík. En sameiginlegar séu hugsjónir sem birtist í grunnstefnu flokksins. „Við þurfum hins vegar að berjast fyrir stefnunni og hugsjónunum. Þurfum kjark og þor í stað þess að berast með straumnum, sem á það til að fara í misgóðan farveg, öllum til tjóns.“

Eins og Brynjar kemur inná lenti hann á milli steins og sleggju í prófkjöri Sjálfstæðismanna, milli tveggja fylkinga þeirra Guðlaugs Þórs Þórðarsonar utanríkisráðherra og Áslaugar Örnu Sigurbjörnsdóttur dómsmálaráðherra sem tókust á um oddvitasætið og hafði Guðlaugur Þór þar betur. Brynjar sóttist eftir öðru sæti í prófkjörinu en hafnaði í því fimmta.

„Úr­slitin eru tals­verð von­brigði fyrir mig en skila­boðin eru skýr. Ég trúi því að Sjálf­stæðis­flokknum muni vegna vel í komandi kosningum. Ég kveð því stjórn­málin sáttur,“ sagði Brynjar eftir að niðurstaðan lá fyrir. Hann gekkst fúslega við því í viðtölum að vera fúll og grútspældur með þessa niðurstöðu. En sagði Sjálfstæðismenn þá sem kusu í prófkjörinu, sem var sameiginlegt fyrir bæði Reykjavíkurkjördæmin, hafa kveðið upp sinn dóm og það yrði þá bara svo að vera.

Íhaldssami armur flokksins verður undir

Fyrir ofan hann í prófkjörinu voru auk Guðlaugs Þórs og Áslaugar Örnu þær Diljá Mist Einarsdóttir aðstoðarmaður Guðlaugs Þórs og varaþingmaðurinn Hildur Sverrisdóttir. Sigríður Á. Andersen þingmaður og fyrrverandi dómsmálaráðherra galt afhroð í prófkjörinu og Birgir Ármannsson þingflokksformaður náði aðeins sjötta sætinu. Niðurstöðuna má túlka sem svo að sá armur flokksins sem kenna má við íhald og frjálshyggju hafi orðið undir. Og Sjálfstæðisflokkurinn að einhverju leyti verið kvenvæddur í leiðinni.

Brynjar er öðrum þræði talsmaður hóps sem forysta flokksins vill síður að flækist yfir til Miðflokksins en Sigmundur Davíð Gunnlaugsson formaður hans bíður með opinn arminn fyrir Brynjari og öðrum Sjálfstæðismönnum sem tilheyra þeirri fylkingu. Og atkvæðum sem þeim fylgja. Guðlaugur Þór hefur sagt að missir væri af Brynjari og er meðal fjölmargra sem vildi að hann endurskoðaði ákvörðun sína. Honum hefur nú orðið að ósk sinni.

Núverandi þingmenn flokksins í Reykjavík eru Guðlaugur Þór, Áslaug Arna og Birgir í norður en Sigríður Á. Andersen og Brynjar í suður. Brynjar greindi frá ákvörðun sinni í Harmageddon í morgun.