Innlent

Dæmdur í 14 ára fangelsi fyrir að bana eigin­konu sinni

Hallgerður Kolbrún E. Jónsdóttir skrifar
Maðurinn var dæmdur í fjórtán ára fangelsi fyrir að hafa banað eiginkonu sinni. 
Maðurinn var dæmdur í fjórtán ára fangelsi fyrir að hafa banað eiginkonu sinni.  Vísir/Vilhelm

Karlmaður var í dag sakfelldur í Landsrétti fyrir að hafa banað eiginkonu sinni í Sandgerði og dæmdur í fjórtán ára fangelsi. Maðurinn er sagður hafa þrengt að hálsi hennar með þeim afleiðingum að hún lést af völdum köfnunar. Landsréttur segir að um stórhættulega atlögu hafi verið að ræða og að maðurinn hafi hlotið að vera ljóst að langlíklegast væri að bani hlytist af henni.

Málið var tekið fyrir í Héraðsdómi Reykjaness í janúar síðastliðnum og ríkissaksóknari skaut málinu til Landsréttar í kjölfarið. Landsréttur staðfesti dóm héraðsdóms.

Atvikið átti sér stað þann 28. mars á síðasta ári. Maðurinn var handtekinn fjórum dögum eftir atburðinn eftir að bráðabirgðaniðurstaða réttarkrufningar lá fyrir. Var það niðurstaða réttarmeinafræðings að konan hafi látist af völdum köfnunar eftir að þrengt var að hálsi hennar.

Maðurinn sagðist ekki muna eftir því að hafa beitt eiginkonu sína ofbeldi af neinu tagi. Hann lýsti því fyrir héraðsdómi að þau hafi setið við drykkju föstudagskvöldið 27. mars og eitthvað fram eftir.

„Hann kvaðst hafa farið í „blackout“ en myndi síðast eftir sér í sófa í stofunni að horfa á sjónvarp. Hann hefði rumskað í sófanum um morguninn eða um hádegisbil en snúið sér á hina hliðina og haldið áfram að sofa. Hann hefði síðan vaknað síðla dags og þá komið að A látinni í hinum sófanum í stofunni,“ segir í dómi Landsréttar.

Meðal sönnunargagna voru mælingar um netnotkun og hreyfingu Gallup-mæla sem maðurinn og konan báru og nema hljóð úr útsendingum hljóðvarps og sjónvarps. Hreyfing kom fram í mælum beggja eftir klukkan 6:11 að morgni laugardagsins 28. mars en eftir klukkan 12:03 nam mælir konunnar ekki hreyfingu. Ekki namst hreyfing á mæli mannsins á milli klukkan 12:41 og 17:13 þegar báðir mælarnir voru settir í hleðslu.

Maðurinn hringdi í dóttur sína klukkan 18:06 og syni sína í beinu framhaldi en dóttir hans hringdi í Neyðarlínuna af heimili föður síns klukkan 18:40. Læknir staðfesti andlát konunnar á vettvangi klukkan 19:24. Læknirinn vitnaði fyrir héraðsdómi að líkskoðun hafi bent til þess að konan hafi látist að minnsta kosti tveimur til fjórum tímum áður en andlátið var staðfest. Af því megi ráða að konan hafi látist fyrir klukkan 17 þennan dag og þá voru þau hjónin ein í húsinu. Maðurinn sagðist ekki hafa hringt í Neyðarlínuna vegna þess að hann var viss um að konan væri látin.


Tengdar fréttir

Kröfu um van­hæfni með­dóms­manns í morð­máli hafnað

Hæsti­réttur hefur hafnað kröfu verjanda mannsins, sem var dæmdur í 14 ára fangelsi í héraði fyrir að hafa banað eigin­konu sinni í Sand­gerði í fyrra, um að sér­fróður með­dóms­maður viki sæti í málinu fyrir Lands­rétti. Verjandinn taldi tengsl með­dóms­mannsins við þá sem hafa komið að dómi og rann­sókn málsins, þar á meðal réttar­meina­fræðingsins sem krufði konuna.

„Við þurfum ekkert að vita af hverju hún lést“

Fjölskipaður Héraðsdómur Reykjaness telur að atlaga karlmanns á sextugsaldri að konu sinni hafi verið stórhættuleg og honum mátt vera ljóst að langlíklegast væri að hún myndi leiða til dauða. Karlmaðurinn var dæmdur í fjórtán ára fangelsi í héraði þann 13. janúar fyrir manndráp á heimili þeirra hjóna í Sandgerði.

Í gæsluvarðhald eftir að hafa verið dæmdur í fjórtán ára fangelsi

Maðurinn sem var dæmdur í fjórtán ára fangelsi í dag fyrir að bana eiginkonu sinni í Sandgerði, hefur verið úrskurðaður í fimm mánaða gæsluvarðhald. Hann hefur verið frjáls ferða sinna frá því í október þegar Landsréttur felldi úr gildi gæsluvarðhald hans. Þá hafði hann verið í gæsluvarðhaldi frá apríl.

Talinn hafa þrengt að hálsi eiginkonu sinnar sem lést

Karlmaður á sextugsaldri, sem hefur verið ákærður fyrir manndráp með því að hafa banað eiginkonu sinni á heimili þeirra í Sandgerði í lok mars, er talinn hafa þrengt svo að hálsi hennar að hún lést af völdum köfnunar.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×