Fótbolti

Úkraína þarf að breyta treyjunni fyrir EM

Runólfur Trausti Þórhallsson skrifar
Umrætt slagorð.
Umrætt slagorð. Andrii Pavelko/Reuters

Evrópska knattspyrnusambandið, UEFA, hefur skikkað Úkraínu til að breyta treyju sinni áður en Evrópumótið í knattspyrnu hefst á morgun. Ástæðan eru kvartanir Rússa yfir slagorðum og útlínum sem tákna Úkraínu á treyjunni.

Framan á treyju Úkraínu eru útlínur landsins. Innihalda útlínurnar Krímskaga sem Rússar innlimuðu ólöglega árið 2014. Telja Rússar landsvæðið heyra undir sig en ljóst er að Úkraína er ekki sama sinnis.

UEFA samþykkti upphaflega treyju Úkraínu en hefur nú beðið Úkraínu um að fjarlægja slagorð af treyjunni.

„Dýrð sé hetjum okkar,“ stendur í hálsmáli treyjunnar. Téð slagorð fór í gegnum endurnýjun lífdaga meðal hermanna landsins er Rússar réðust inn á Krímskaga árið 2014. Slagorðið hefur samt verið við lýði síðan í seinni heimsstyrjöldinni á síðustu öld.

Slagorðið verður því hvergi sjáanlegt þegar Úkraína hefur leik á EM á sunnudaginn kemur, þann 13. júní. Lærisveinar Andriy Shevchenko mæta þá Hollendingum í því sem er fyrir fram talið uppgjör toppliðanna í C-riðli.


EM 2020 verður sýnt á Stöð 2 Sport EM 2020 sem er hluti af Sportpakkanum, Stóra pakkanum og Risapakkanum. EM 2020 verður einnig hægt að kaupa stakt á kr. 6.990 en fyrir viðskiptavini með aðra áskrift en ofangreindar frá Stöð 2 kostar áskriftin kr. 3.990.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.