Fótbolti

Kai Havertz: Við unnum helvítis Meistaradeildina

Hjörtur Leó Guðjónsson skrifar
Kai Havertz og Timo Werner fagna sigri Chelsea í Meistaradeildinni.
Kai Havertz og Timo Werner fagna sigri Chelsea í Meistaradeildinni. Matthew Ashton - AMA/Getty Images

Kai Havertz skoraði eina mark leiksins þegar Chelsa og Manchester City mættust í úrslitaleik Meistaradeildar Evrópu fyrr í kvöld. Þetta var fyrsta mark Havertz í Meistaradeildinni.

„Ég veit ekki hvað ég á að segja,“ sagði Havertz eftir sigurinn í kvöld. „Þetta er ólýsanleg tilfinning og við eigum þetta skilið.“

Þetta var fyrsta mark Kai Havertz í Meistaradeildinni, en þetta var tólfti leikurinn hans í keppninni. Það má því segja að hans fyrsta mark hafi komið á fullkomnum tíma.

„Ég er búinn að bíða lengi eftir þessu og nú tókst það loksins. Mig langar að þakka fjölskyldunni minni. Mig langar að þakka foreldrum mínum og systkinum.“

Havertz var svo í lokin minntur á það að hann væri dýrasti leikmaður í sögu Chelsea, og því væri mikil pressa á honum.

„Ef ég á að vera alveg hreinskilinn þá er mér alveg drullu sama akkúrat núna. Við unnum helvítis Meistaradeildina.“


Tengdar fréttir

Chelsea er Evrópumeistari í annað sinn

Chelsea er Evrópumeistari eftir 1-0 sigur gegn Manchester City í úrslitaleik Meistaradeildar Evrópu. Kai Havertz skoraði eina mark leiksins á 42. mínútu.




Fleiri fréttir

Sjá meira


×