Sendiherrafrú ber fyrir sig friðhelgi vegna löðrungs

Kjartan Kjartansson skrifar 17. maí 2021 13:52

Eiginkona belgíska sendiherrans í Suður-Kóreu ber fyrir sig friðhelgi erindreka erlendra ríkja til að komast undan ákæru eftir að hún sást greiða afgreiðslukonu í verslun kinnhest í Seúl. Starfsfólk verslunarinnar hafði grunað hana um hnupl.

Uppákoman náðist á upptöku öryggismyndavélar í versluninni. Þar virtist Xiang Xueqiu, 63 ára gömul eiginkona Peters Lescouhier, sendiherra Belgíu, slá starfsmann. Breska ríkisútvarpið BBC segir að starfsmenn verslunarinnar hafi viljað kanna hvort að fötin sem Xiang var í þegar hún hugðist yfirgefa verslunina væru hennar eigin.

Xiang er sögð hafa mátað föt í klukkustund áður en hún yfirgaf verslunina. Hún var í fötum frá sömu verslun og vildu starfsmennirnir kanna hvort þau væru ný og hvort hún hefði greitt fyrir þau. Á upptökunni sást að Xiang elti starfsmann aftur inn í verslunina en þar virtist hún ýta við og slá annan starfsmann sem reyndi að skerast í leikinn.

Sendiherrann hefur þegar beðist afsökunar á „óásættanlegum“ viðbrögðum konu sinnar.

Suður-Kórea Belgía

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.