Menning

Hand­bendi brúðu­leik­hús hlaut Eyrar­rósina

Atli Ísleifsson skrifar
Greta Clough, stofnandi og listrænn stjórnandi Handbendis.
Greta Clough, stofnandi og listrænn stjórnandi Handbendis. Patrik Ontkovic

Handbendi brúðuleikhús á Hvammstanga hlaut Eyrarrósina í ár, viðurkenningu fyrir framúrskarandi menningarverkefni utan höfuðborgarsvæðisins. Þetta var í sautjánda sinn sem Eyrarrósin er afhent og í fyrsta sinn sem Eyrarrósin fellur í skaut verkefnis á Norðurlandi vestra.

Viðurkenning var afhent við hátíðlega athöfn á Patreksfirði í gær, en það var Eliza Reid forsetafrú og verndari Eyrarrósarinnar sem veitti verðlaunin.

Í tilkynningu kemur fram að Greta Clough, stofnandi og listrænn stjórnandi Handbendis, hafi tekið á móti viðurkenningunni og verðlaunafé að upphæð tveimur og hálfri milljón króna.

„Alls bárust 36 umsóknir um Eyrarrósina og hvatningarverðlaun Eyrarrósarinnar 2021 hvaðanæva af landinu.

Hvatningarverðlaun Eyrarrósarinnar eru ný af nálinni og eru veitt þremur verkefnum sem hafa verið starfrækt í þrjú ár eða skemur. Verðlaunin eru veitt metnaðarfullum verkefnum sem þykja hafa listrænan slagkraft, jákvæð áhrif á nærsamfélagið og hafa alla burði til að festa sig í sessi.

Hvatningarverðlaun Eyrarrósarinnar 2021 hlutu Boreal Screendance Festival, Akureyri, IceDocs – Iceland Documentary Film Festival, Akranesi og Röstin gestavinnustofa, Þórshöfn. Hljóta þau hvert um sig verðlaunafé að upphæð kr. 750.000 auk gjafakorts frá Icelandair að upphæð kr. 100.000.

Eyrarrósin er samstarfsverkefni Listahátíðar, Byggðastofnunar og Icelandair sem undirrituðu við sama tækifæri endurnýjaðan samstarfssamning út árið 2024.“

Frá afhendingunni á Patreksfirði í gær.Patrik Ontkovic

Eyrarrósin 2021:

Handbendi brúðuleikhús, Hvammstanga

Handbendi var stofnað árið 2016 af leikstjóranum og brúðuleikaranum Gretu Clough og er hún jafnframt listrænn stjórnandi leikhússins. Handbendi er eina starfandi atvinnuleikhúsið á Norðurlandi vestra og eitt af sárafáum slíkum utan höfuðborgarsvæðisins.

Fjölbreytt starfsemi Handbendis byggir á bjargfastri trú á gildi listanna fyrir dreifðari byggðir en ekki síður á gildi þess sem dreifbýlið hefur uppá að bjóða fyrir listirnar.

Auk þess að framleiða brúðuleiksýningar í háum gæðaflokki, ferðast með þær um landið og á erlendar hátíðir, rekur Handbendi stúdíó þar sem áhersla er lögð á upptökur og framleiðslu á stafrænu efni af ýmsum toga.. Þá leggur leikhúsið sérstaka áherslu á að hafa frumkvæði að og leiða samfélagstengd verkefni af ýmsum toga, þar á meðal með börnum og ungu fólki.

Nýjasta skrautfjöðrin í hatt Handbendis er alþjóðleg brúðuleikhúshátíð - Hvammstangi International Puppet Festival - eða HIP Fest - sem fram fór í fyrsta sinn á síðasta ári og verður hér eftir árlegur viðburður í október.

Hvatningarverðlaun Eyrarrósarinnar: Boreal Screendance Festival- Akureyri

Boreal er alþjóðleg og fór í fyrsta sinn fram í nóvember 2020 í Mjólkurbúðinni í Listagilinu á Akureyri. Á fyrstu hátíðinni í fyrra voru sýnd 28 verk eftir 18 listamenn víða að úr heiminum. Stefnt er að enn umfangsmeiri hátíð í nóvember á þessu ári.

Hvatningarverðlaun Eyrarrósarinnar:Röstin - Þórshöfn á Langanesi

Röstin er tilraunakennd gestavinnustofa fyrir listafólk á Þórshöfn á Langanesi og verður haldin í þriðja sinn með formlegum hætti í sumar. 8–10 listamönnum úr öllum áttum er boðin þátttaka í hvert sinn og er gisting og vinnuaðstaða þeim að kostnaðarlausu.

Röstin er vettvangur fyrir fjölbreyttan hóp listamanna til að njóta andrýmis, vinna að listsköpun sinni, kynnast öðru listafólki, tengjast samfélaginu á Langanesi, og auðga um leið bæjarlífið með uppákomum fyrir íbúa.

Hvatningarverðlaun Eyrarrósarinnar:  IceDocs - Akranesi

Iceland Documentary Film Festival eða IceDocs er alþjóðleg heimildamyndahátíð á Akranesi sem stofnuð var árið 2019. Hátíðin verður haldin í þriðja sinn 23. til 27. júní næstkomandi.

IceDocs hefur þá sérstöðu að að vera eina alþjóðlega kvikmyndahátíð landsins sem sýnir eingöngu skapandi heimildamyndir. Á hátíðinni er áhorfendum boðið upp á rjómann af þeim heimildamyndum sem koma út í heiminum auk þess sem boðið er upp á fjölda sérviðburða.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.