Krókódíll stöðvaði fótboltaæfingu

Það væri svo sem ekkert slæmt að hafa hann í vörninni en Toronto FC fengi seint leyfi fyrir því að stilla upp krókódílnum sem mætti á æfingu liðsins á dögunum.

Toronto FC varð að stoppa æfingu liðsins þegar veglegur krókódíll birtist skyndilega á æfingavellinum. Leikmenn liðsins voru fljótir að forða sér og síðan var reynt að koma óboðna gestinum í burtu.

Toronto FC er frá Kanada en vegna sóttvarnarreglna í Kanada þá hefur þetta kanadíska félag þurft að spila og æfa í Bandaríkjunum til að geta tekið þátt í MLS-deildinni. Liðið spilar heimaleiki sína á Exploria leikvanginum í Orlando á Flórída.

Leikmenn Toronto FC voru því staddir á Flórída þar sem liðið var að undirbúa sig fyrir leik í átta liða úrslitum Meistaradeild Concacaf. Leikmenn liðsins voru kannski eitthvað skelkaðir ennþá í leiknum því hann tapaðist 3-1.

Hér fyrir neðan má sjá myndband af því þegar krókódíllinn mætti á þessa lokuðu æfingu Toronto FC.