Skoraði ekki í fjórtán mánuði en er nú sá heitasti í ensku úrvalsdeildinni

Kelechi Iheanacho lagði upp jöfnunarmarkið og skoraði sjálfur sigurmarkið þegar Leicester City vann 2-1 sigur á Crystal Palace í ensku úrvalsdeildinni gærkvöldi og fyrir vikið er liðið með sjö stiga forskot á liðið í fimmta sæti.

Iheanacho hefur nú annað hvort skorað (11 mörk) eða gefið stoðsendingu (3) í átta af síðustu níu leikjum Leicester City í öllum keppnum.

Jamie Vardy hefur haldið uppi sóknarleik Leicester svo lengi en nú myndar hann frábært framherjapar með Kelechi Iheanacho. Vardy hefur ekki skorað mikið að undanförnu en Iheanacho þeim mun meira.

Urðu að breyta vegna meiðsla manna

„Kelechi hefur verið alveg ótrúlegur undanfarna mánuði. Forgangsatriði hjá mér sem þjálfara er að hjálpa leikmönnum mínum að verða betri. Þetta hefur verið erfitt fyrir Kels vegna þess hvernig við spiluðum vanalega með aðeins einn framherja, sem var Jamie Vardy. Við urðum að breyta því vegna meiðsla og hann hefur komið inn og verið stórkostlegur. Ekki bara með því að skora þessi mörk heldur er hann svo sáttur með að vinna vel fyrir liðið og gæði hans eru stórbrotin,“ sagði knattspyrnustjórinn Brendan Rodgers.

Það sem er ekki síst athyglisvert við frammistöðu Kelechi Iheanacho er að hann var enn ekki búinn að skora eitt einasta deildarmark 2. febrúar síðastliðinn. Iheanacho opnaði loksins markareikning sinn í 2-0 sigri á Fulham 3. febrúar.

Var bara með eitt deildarmark 2. mars

Hann hafði verið ónotaður varamaður í tveimur leikjum þar á undan og það átti eftir að líða annar mánuður þar til að hann skoraði deildarmark númer tvö á leiktíðinni.

Þá tryggði hann Leicester City 1-1 jafntefli á móti Burnley 3. mars. Frá og með þeim leik þá hefur Iheanacho skoraði meira en nokkur annar framherji í ensku úrvalsdeildinni eða alls níu mörk í sjö deildarleikjum.

Iheanacho, sem er enn bara 24 ára gamall, hóf feril sinn í ensku úrvalsdeildinni með Manchester City og lék í tvö tímabil með City þar til að Leicester City keypti hann fyrir 25 milljónir punda í ágúst 2017.

Það gekk hins vegar ekki vel að skora og hann var aðeins með 4 mörk í 51 leik á fyrstu tveimur tímabilum sínum og skoraði ekki deildarmark í fjórtán mánuði frá september 2018 til desember 2019.

Mörkin urðu alls 5 í 20 deildarleikjum á síðustu leiktíð og hann var búinn að spila tíu leiki áður en hann skoraði fyrsta markið sitt á núverandi tímabili.

Iheanacho er markahæsti maður Leicester City á tímabilinu með 17 mörk í öllum keppnum en þetta er í fyrsta sinn síðan 2014-15 þar sem Jamie Vardy er ekki efstur á lista.

Algjör martröð á æfingum

Kasper Schmeichel, markvörður Leicester City, hrósaði í samtali við Sky Sports. „Kels er svo klókur þegar kemur að því að klára færin. Hann veit hvernig hann á að færa sig til og skjóta snöggt. Hann er einkar öflugur í því að hreyfa sig rétt fyrir skotið og setja hann síðan milli fóta varnarmannsins og framhjá markverðinum,“ sagði Kasper Schmeichel.

„Hann er alltaf að gera þetta á æfingum. Hann er algjör martröð á æfingum ef ég segi alveg eins og er. Hann er bara stór strákur sem getur búið sér til pláss. Hann er fljótur og hefur allt til alls til að vera topp framherji. Hann er líka að sýna það nú sem er frábært“ sagði Schmeichel.