Enski boltinn

Mourinho rekinn

Ingvi Þór Sæmundsson skrifar
José Mourinho hefur verið látinn fara frá Tottenham.
José Mourinho hefur verið látinn fara frá Tottenham. epa/ANTONIO BAT

Tottenham hefur sagt José Mourinho upp störfum. Frá þessu er greint í Telegraph.

Ryan Mason og Chris Powell, fyrrverandi leikmenn Tottenham, taka líklega tímabundið við liðinu og stýra því út tímabilið.

Mourinho tók við Tottenham af Mauricio Pochettino í nóvember 2019. Spurs endaði í 6. sæti ensku úrvalsdeildarinnar á síðasta tímabili.

Tottenham gerði 2-2 jafntefli við Everton á föstudaginn í síðasta leiknum undir stjórn Mourinhos. 

Tottenham mætir Manchester City í úrslitaleik enska deildabikarsins á sunnudaginn. Mourinho var því látinn taka pokann aðeins sex dögum fyrir þennan mikilvæga leik þar sem Spurs getur unnið sinn fyrsta titil síðan 2008.

Tottenham byrjaði tímabilið vel og var um tíma á toppi ensku úrvalsdeildarinnar. Eftir áramót hefur hins vegar hallað verulegan undan fæti hjá Spurs sem hefur aðeins unnið einn af síðustu fimm deildarleikjum sínum.

Mourinho skilur við Tottenham í 7. sæti ensku úrvalsdeildarinnar.

Uppfært klukkan 09:55

Tottenham hefur staðfest brottrekstur Mourinhos og aðstoðarmanna hans.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.